راولپنڈی (ویب ڈیسک): پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے پریس کانفرنس کرتے ہوئے بتایا ہے کہ سیکیورٹی افواج نے ملک بھر میں دہشت گردوں کے خلاف مؤثر کارروائیاں جاری رکھی ہوئی ہیں۔ رواں سال کے دوران اب تک دہشت گردوں کے خلاف مجموعی طور پر 40,348 انٹیلی جنس بیسڈ آپریشنز کیے جا چکے ہیں۔ ان کارروائیوں کے دوران اب تک 2,084 مصدقہ دہشت گردوں کو جہنم واصل کیا گیا ہے، جس کا مطلب ہے کہ روزانہ اوسطاً 10 دہشت گردوں کا خاتمہ کیا جا رہا ہے۔
ترجمان پاک فوج کا کہنا تھا کہ پولیس، سول آرمڈ فورسز، انٹیلی جنس ایجنسیوں اور مسلح افواج کی جانب سے روزانہ اوسطاً 194 آپریشنز کیے جا رہے ہیں۔ ملک بھر میں امن و امان کے قیام کے لیے صرف خیبر پختونخوا میں دہشت گردوں کے خلاف 1,971 کارروائیوں کو انجام دیا گیا۔ ڈی جی آئی ایس پی آر نے واضح کیا کہ دہشت گردی کے خلاف "عزمِ استحکام” مہم کے تحت فورسز پوری قوت سے برسرِ پیکار ہیں۔
پریس کانفرنس کے دوران بلوچستان کی سیکیورٹی صورتحال پر خصوصی توجہ دی گئی۔ ڈی جی آئی ایس پی آر نے انکشاف کیا کہ بھارت بلوچستان میں دہشت گردی کی حالیہ لہر کو مینیج کر رہا ہے اور کالعدم بی ایل اے کو فنڈنگ اور معاونت فراہم کر رہا ہے۔ انہوں نے بتایا کہ پاکستان کے امن اور معاشی ترقی کے مخالف عناصر ان کارروائیوں کے پیچھے ہیں۔ بلوچستان کی سیکیورٹی کے حوالے سے اب تک 31,000 سے زائد سیکیورٹی آپریشنز کیے جا چکے ہیں تاکہ صوبے میں امن کو برقرار رکھا جا سکے۔
لیفٹیننٹ جنرل احمد شریف چوہدری نے وطنِ عزیز کے دفاع میں جانیں قربان کرنے والے شہداء کو زبردست خراجِ عقیدت پیش کیا۔ انہوں نے بتایا کہ رواں سال کے دوران دہشت گردی کے خلاف جنگ میں 819 افراد نے جامِ شہادت نوش کیا، جن میں پاک فوج کے 303 افسران و جوان، سیکیورٹی نافذ کرنے والے اداروں کے 194 اہلکار اور 322 معصوم شہری شامل ہیں۔ مزید برآں، ملک بھر میں 28 خودکش حملے ریکارڈ کیے گئے، اور حالیہ حملوں (جیسے کراچی اور ٹانک میں ہونے والے واقعات) میں افغان باشندوں کے ملوث ہونے کے ثبوت ملے ہیں۔
ڈی جی آئی ایس پی آر نے واضح کیا کہ دہشت گرد اور فتنہ الخوارج جہاں بھی پاک فوج کے خلاف کارروائی کی کوشش کرتے ہیں، انہیں عبرت ناک شکست کا سامنا کرنا پڑتا ہے۔ انہوں نے پڑوسی ممالک اور بھارت کو سخت وارننگ دیتے ہوئے کہا کہ پاکستان اپنی سرحدوں اور شہریوں کی حفاظت کے لیے ہر حد تک جائے گا اور ملک دشمن عناصر کی تمام سازشوں کو ناکام بنا دیا جائے گا
