اسلام آباد(الفجرآن لائن): چیئرپرسن بینظیر انکم سپورٹ پروگرام (بی آئی ایس پی)، سینیٹر روبینہ خالد نے زیب ٹیک (SZABIST ZABTech) کے ایگزیکٹو ڈائریکٹر، وحیدا مہیسر سے ملاقات کی، جس میں کراچی اور شہید بینظیر آباد میں بی آئی ایس پی سے مستفید ہونے والے خاندانوں کی 50 خواتین کو فنی و پیشہ ورانہ تربیت فراہم کرنے کے لیے ایک پائلٹ منصوبے پر تبادلۂ خیال کیا گیا۔
یہ پائلٹ منصوبہ خاتونِ اوّل آصفہ بھٹو زرداری کی ہدایات پر شروع کیا جا رہا ہے، جو خواتین کو معاشی طور پر بااختیار بنانے کے لیے ان کے عزم کا عکاس ہے۔ اس اقدام کے تحت دونوں اضلاع میں سے ہر ایک کی 25 خواتین کو تین ماہ پر مشتمل مارکیٹ کی ضروریات سے ہم آہنگ تکنیکی اور پیشہ ورانہ تربیت فراہم کی جائے گی، تاکہ ان کی ملازمت حاصل کرنے کی صلاحیت میں اضافہ ہو اور انہیں خود روزگار کے مواقع میسر آ سکیں۔
سینیٹر روبینہ خالد نے بی آئی ایس پی کے لیے خاتونِ اوّل کی مسلسل معاونت کو سراہا، بالخصوص بینظیر ہنرمند پروگرام (BHP) کے لیے، جس کا مقصد سماجی تحفظ کو ہنرمندی کی ترقی اور پائیدار ذرائع معاش کے مواقع سے منسلک کرنا ہے۔ انہوں نے کہا کہ یہ اقدام خواتین کو بااختیار بنانے کے لیے خاتونِ اوّل کے عزم کو عملی اقدامات میں ڈھالنے کی ایک مثال ہے۔
تربیتی پروگرام میں مارکیٹ کی ضروریات کے مطابق مختلف شعبوں کو شامل کیا جائے گا، جن میں مہمان نوازی، انفارمیشن ٹیکنالوجی اور ڈیجیٹل مہارتیں، بیوٹی سروسز، سلائی، دستکاری، موبائل فون کی مرمت، شمسی توانائی کی ٹیکنالوجی اور کاروباری سرگرمیوں کے آغاز و فروغ سے متعلق تربیت شامل ہیں۔ شرکاء کو سفری اخراجات میں معاونت کے لیے ماہانہ وظیفہ دیا جائے گا، جبکہ تربیت کامیابی سے مکمل کرنے پر انہیں متعلقہ آلات اور اوزار پر مشتمل ٹول کٹس بھی فراہم کی جائیں گی۔ تربیت کے بعد معاونت کے ذریعے فارغ التحصیل خواتین کو ملازمت اور خود روزگار کے مواقع سے منسلک کرنے میں مدد دی جائے گی۔
زیب ٹیک کے نمائندگان نے بی آئی ایس پی کے بینظیر ہنرمند پروگرام کو سراہا اور مستفید ہونے والے خاندانوں کے لیے فنی تربیت کے دائرہ کار کو وسعت دینے کی غرض سے بی آئی ایس پی کے ساتھ طویل المدتی شراکت داری قائم کرنے میں دلچسپی کا اظہار کیا۔ دونوں جانب سے امید ظاہر کی گئی کہ یہ پائلٹ منصوبہ مستقبل میں وسیع تر تعاون کی راہ ہموار کرے گا۔
اجلاس میں بی آئی ایس پی کے ڈائریکٹر جنرل، کنڈیشنل کیش ٹرانسفرز، ڈاکٹر عاصم اعجاز؛ فوکل پرسن بینظیر ہنرمند پروگرام، حمیرا فاروق؛ ٹریننگ اسپیشلسٹ بینظیر ہنرمند پروگرام، عون ساہی؛ اور زیب ٹیک کی پروگرام مینیجر، ارشمہ شاہ نے شرکت کی۔
