لاہور : عدالت نے صحافی عمران ریاض کو کار سرکار مدداخلت مقدمے میں ڈسچارج کرتے ہوئے رہاء کرنے کا حکم دے دیا۔
تفصیلات کے مطابق لاہور کینٹ کچہری میں جوڈیشل مجسٹریٹ نے صحافی عمران ریاض کیخلاف کار سرکار میں مداخلت کے مقدمے کی سماعت کی ۔عمران ریاض کو جسمانی ریمانڈ کے حصول کیلئے عدالت میں پیش کرتے ہوئے پولیس نے موقف اپنایا کہ ملزم کو ایف آئی آر میں نامزد ہونے پر گزشتہ روز گرفتار کیا گیا ہے ، ملزم کی نشاندہی پر دیگر ملزمان کو گرفتار کیا جانا ہے، لہٰذا 10روزہ جسمانی ریمانڈ منظور کیا جائے۔وکیل میاں علی اشفاق نے جسمانی ریمانڈ کی مخالفت کرتے ہوئے کہا کہ عمران ریاض پر درج مقدمہ جھوٹا اور بے بنیاد ہے۔
بعد ازاں عدالت نے ریمانڈ بارے فیصلہ محفوظ کر لیا۔ کچھ دیر بعد عدالت نے فیصلہ سناتے ہوئے کہا کہ ایف آئی آر میں درج جرم اور ریمانڈ پیپر کی نوعیت قابل ضمانت ہے، لہٰذا قانون کے مطابق جسمانی ریمانڈ نہیں دیا جاسکتا،تفتیشی افسر کی درخواست مسترد کی جاتی ہے۔عدالت نے کہا کہ ملزم کیخلاف ثبوت ناکافی ہیں، لہٰذا عمران ریاض کو کیس سے ڈسچارج کیا جاتا ہے اور تفتیشی افسر کو ہدایت کی جاتی ہے کہ اگر ملزم کسی اور کیس میں مطلوب نہیں ہے تو ان کو رہا کیا جائے۔
