احتجاج میں بری طرح ناکامی پر شرمندگی سے بچنے کیلئے لاشوں کے پیچھے چھپا جارہا ، کوئی 4ہزار کوئی 160 لاشیں کہہ رہا،لاشیں نہ ہوئیں پودے ہوئے جو جگہ جگہ اگ رہے ہیں
عقل سمجھ ،فہم سے عاری افراد کا سیاسی جماعتیں بنانا قوم کی بدقسمتی ہے، وزیر اطلاعات کی پریس کانفرنس
اسلام آباد (الفجر آن لائن) وفاقی وزیر اطلاعات عطا اللہ تارڑ نے پی ٹی آئی میں 6 سے 7 گروپ بننے کا دعوی کرتے ہوئے کہا ہے کہ احتجاج میں بری طرح ناکامی پر شرمندگی سے بچنے کیلئے لاشوں کے پیچھے چھپا جارہا ہے، کوئی 4ہزار کوئی 160 لاشیں کہہ رہا،لاشیں نہ ہوئیں پودے ہوئے جو جگہ جگہ اگ رہے ہیں،عقل سمجھ ،فہم سے عاری افراد کا سیاسی جماعتیں بنانا قوم کی بدقسمتی ہے۔منگل کو اسلام آباد میں سوشل میڈیا پر وائرل فیک ویڈیوز اور اہم سیاسی امور پر گفتگو کرتے ہوئے وفاقی وزیر اطلاعات عطا اللہ تارڑ نے کہا کہ مہنگائی 78ماہ کی کم ترین سطح پر آگئی ہے ، معیشت ترقی کر نہیں رہی بلکہ ترقی کرچکی ہے،سٹاک مارکیٹ میں تیزی سے اضافہ ہورہا ہے، انڈیکس ایک لاکھ پوائنٹس سے تجاوز کرچکا ہے، بیرون ممالک سے بھی انویسٹمنٹ آرہی ہے،یہ ترقی نہیں تو اور ایک کیا ہے، ملک ڈیفالٹ کے دہانے پرتھا،ہم اسے یہاں تک لائے۔
عطاء تارڑ نے پی ٹی آئی کی جانب سے مبینہ پھیلائی جانیوالی فیک ویڈیوز دکھاتے ہوئے کہا کہ یہ کہہ رہے ہیں ہم پر گولیاں چلائی گئیں، یہ گولی چلانے کانہیں بلکہ گولی کرانے کابیانیہ ہے، یہ سیکیورٹی فورسز کو خود نشانہ بناتے ہیں اور جھوٹ بولتے ہیں۔ انہوں نے کہا کہ احتجاج کے دوران مبینہ طور پر رینجرز کی جانب سے کنٹینر سے گرائے گئے شہری کی ہلاکت کا دعویٰ کیا گیا، مذکورہ شخص کا تعلق منڈی بہاؤ الدین سے ہے اور وہ زندہ ہے۔ انہوں نے کہاکہ یہ کہتے ہیں کہ کنٹینر پرنماز پڑھنے والے کوگرادیا، کنٹینرنمازپڑھنے کی جگہ نہیں،نمازپڑھنے کیلئے اسلام آباد میں بہت مساجد ہیں۔
انہوں نے کہاکہ یہ لوگ جھوٹ پر ریاست کو بدنام کرتے ہیں، کوئی کہتا ہے 4ہزار لاشیں ہیں، کوئی کہہ رہا ہے 400لاشیں ہیں ، کوئی کہہ رہا ہے 160لاشیں ہیں، لطیف کھوسہ نے کہا کہ ان کے گھر پر 150 لاشیں موجودہیں۔انہوں نے کہاکہ لاشیں نہ ہوئیں پودے ہوگئے جو جگہ جگہ اگ رہے ہیں، قوم کیساتھ کس طرح کا مذاق کیا جارہا ہے، پارٹی چیئرمین بیرسٹر گوہر کہہ رہے کہ سب بیانئے غلط ہیں ،12لاشیں تھیں، اب 4ہزار کو صحیح مانا جائے یا 400کو۔ انہوں نے کہا کہ ان کی ایک بھی لاش نہیں ہے، اگر ہوتی تو سامنے آجاتی، ایسی چیزیں چھپی نہیں رہتیں، یہ اس طرح کی لاشیں ہیں جو ٹک ٹاک ، فیس بک، ایکس ، واٹس ایپ اور دوسرے سوشل میڈیا نیٹ ورکس پر موجود ہیں۔
انہوں نے کہا کہ قوم کی بدقسمتی ہے کہ عقل سمجھ اور فہم سے عاری افراد بھی سیاسی جماعتیں بنالیتے ہیں۔انہوں نے کہاکہ تحریک انصاف کا اب تک رینجرز اور پولیس کے 4شہید اہلکاروں بارے مذمتی بیان نہیں آیا ہے، انہوں نے متاثرہ خانداروں سے اظہار افسوس اور اظہار ہمدردی تک نہیں کیا۔انہوں نے کہاکہ دنیا کے مہذب ممالک میں کوئی کلاشنکوف، غلیلیں، بنٹے، آنسو گیس کے شیل، دستی بم اور اسٹین گنوں کیساتھ آئے تو احتجاج کی اجازت نہیں دی جاتی، 5منٹ میں اندرکیا جاتا ہے،واشنگٹن اور لندن میں بیٹھ کر آوازیں اٹھانے والے بتائیں کیا وائٹ ہاس یاٹین ڈاؤننگ سٹریٹ کے اس قسم کے ہتھیاروں سے لیس مظاہرین کو احتجاج کی اجازت دی جائے گی؟۔انہوں نے کہا کہ یہ پرامن مظاہرین نہیں تھے، یہ جدید اسلحے سے لیس جتھا تھا جو یہاں دھاوا بولنا چاہتا تھا، کیونکہ لوگ نہ ہونے کے باعث یہ بری طرح ناکام ہوئے ہیں اس لئے اب شرمندگی چھپانے کیلئے لاشوں کے پیچھے چھپ رہے ہیں۔انہوں نے کہا کہ پی ٹی آئی میں 6،7 گروپ بن گئے ہیں اور سب ایک دوسر ے سے دست و گریبان ہیں۔انہوں نے کہا کہ بیرسٹر سیف نے گزشتہ دنوں میری پریس کانفرنس کا جواب دیا، ان سے کہوں گا مجھے چپ ہی رہنے دیں، بہت ساری باتیں ایسی ہیں جو صرف آپ اور میں ہی جانتے ہیں، اگر میں نے وہ باتیں قوم کو بتادیں تو آپ خیبرپختونخوا حکومت کے ترجمان نہیں رہ سکیں گے۔
