کراچی اور شہید بینظیر آباد میں تین ماہ کا پائلٹ منصوبہ، تربیت کے ساتھ ماہانہ وظیفہ اور آلات پر مشتمل ٹول کٹس بھی فراہم کی جائیں گی
اسلام آباد (الفجر آن لائن): بینظیر انکم سپورٹ پروگرام (بی آئی ایس پی) اور شہید ذوالفقار علی بھٹو انسٹی ٹیوٹ آف سائنس اینڈ ٹیکنالوجی کے ادارے زیب ٹیک نے مستفید ہونے والے خاندانوں کی خواتین کو فنی و پیشہ ورانہ تربیت فراہم کرنے کے لیے مشترکہ پائلٹ منصوبے پر کام کرنے پر اتفاق کیا ہے۔ اس منصوبے کے تحت کراچی اور شہید بینظیر آباد کی 50 خواتین کو ہنر سکھایا جائے گا۔
بی آئی ایس پی کی چیئرپرسن سینیٹر روبینہ خالد نے زیب ٹیک کے ایگزیکٹو ڈائریکٹر وحید مہیسر سے ملاقات کی، جس میں منصوبے کے خدوخال پر تبادلۂ خیال کیا گیا۔ یہ اقدام خاتونِ اوّل آصفہ بھٹو زرداری کی ہدایات پر شروع کیا جا رہا ہے، جس کا مقصد خواتین کو معاشی طور پر بااختیار بنانا ہے۔
منصوبے کے تحت دونوں اضلاع سے 25، 25 خواتین کو تین ماہ کی تربیت دی جائے گی۔ تربیتی شعبوں میں مہمان نوازی، انفارمیشن ٹیکنالوجی، ڈیجیٹل مہارتیں، بیوٹی سروسز، سلائی، دستکاری، موبائل فون کی مرمت، شمسی توانائی کی ٹیکنالوجی اور کاروبار شروع کرنے سے متعلق تربیت شامل ہوگی۔
شرکاء کو سفری اخراجات میں معاونت کے لیے ماہانہ وظیفہ دیا جائے گا، جبکہ کامیابی سے تربیت مکمل کرنے والی خواتین کو متعلقہ آلات اور اوزار پر مشتمل ٹول کٹس بھی فراہم کی جائیں گی۔ تربیت کے بعد انہیں ملازمت اور خود روزگار کے مواقع سے منسلک کرنے میں بھی مدد دی جائے گی۔
سینیٹر روبینہ خالد نے بی آئی ایس پی کے لیے خاتونِ اوّل کی معاونت کو سراہتے ہوئے کہا کہ بینظیر ہنرمند پروگرام کا مقصد سماجی تحفظ کو ہنرمندی کی ترقی اور پائیدار ذرائع معاش سے جوڑنا ہے۔
زیب ٹیک کے نمائندگان نے پروگرام کو سراہا اور مستفید خاندانوں کے لیے فنی تربیت کا دائرہ وسیع کرنے کی غرض سے بی آئی ایس پی کے ساتھ طویل المدتی شراکت داری میں دلچسپی ظاہر کی۔ دونوں جانب سے امید ظاہر کی گئی کہ یہ پائلٹ منصوبہ مستقبل میں مزید تعاون کی راہ ہموار کرے گا۔
اجلاس میں بی آئی ایس پی کے ڈائریکٹر جنرل کنڈیشنل کیش ٹرانسفرز ڈاکٹر عاصم اعجاز، بینظیر ہنرمند پروگرام کی فوکل پرسن حمیرا فاروق، ٹریننگ اسپیشلسٹ عون ساہی اور زیب ٹیک کی پروگرام مینیجر ارشمہ شاہ بھی شریک ہوئیں۔
