پاک چین اسٹریٹجک شراکت داری میں اہم سنگ میل، پاکستانی خلا باز تیانگونگ خلائی اسٹیشن پہنچنے والے پہلے غیر ملکی خلا باز ہوں گے، دو پاکستانی امیدواروں نے تربیت مکمل کرلی
اسلام آباد (الفجرآن لائن) پاکستان کے خلائی پروگرام اور پاک چین اسٹریٹجک شراکت داری میں ایک نئے تاریخی باب کا اضافہ ہونے جا رہا ہے، جہاں پاکستان کا پہلا خلا باز چین کے شینزو 24 (Shenzhou-24) خلائی مشن کے ذریعے خلا میں روانہ ہوگا۔ اس پیش رفت کو پاکستان کے انسانی خلائی پرواز کے پروگرام، سائنسی تحقیق اور جدید خلائی ٹیکنالوجی کے شعبوں میں اہم سنگ میل قرار دیا جا رہا ہے۔
چائنا مینڈ اسپیس ایجنسی کے اعلان کے مطابق پاکستانی خلا باز کو چین کے شینزو 24 خلائی جہاز کے ذریعے تیانگونگ خلائی اسٹیشن بھیجا جائے گا، جہاں وہ بطور پے لوڈ اسپیشلسٹ خدمات انجام دیں گے۔ اس طرح پاکستانی خلا باز تیانگونگ خلائی اسٹیشن پر پہنچنے والے پہلے غیر ملکی خلا باز ہوں گے۔
اس تاریخی مشن کے لیے پاکستان کے دو امیدوار محمد ذیشان علی اور خرم داؤد چین میں اپنی خلائی تربیت کامیابی سے مکمل کر چکے ہیں۔ دونوں امیدواروں میں سے ایک کو حتمی طور پر مشن کے لیے منتخب کیا جائے گا، جو پاکستان کی تاریخ میں پہلی انسانی خلائی پرواز کی نمائندگی کرے گا۔
چینی خلائی ادارے نے شینزو 24 مشن کا باضابطہ لوگو بھی جاری کیا ہے، جس میں پاکستان کے قومی پھول چنبیلی کو خصوصی طور پر شامل کیا گیا ہے۔ لوگو میں چنبیلی کی شمولیت پاکستان اور چین کے درمیان دوستی، باہمی اعتماد، قریبی تعاون اور زمین سے خلا تک پھیلی اسٹریٹجک شراکت داری کی علامت قرار دی جا رہی ہے۔
یہ پیش رفت پاکستان اور چین کے درمیان خلائی تحقیق، سائنسی تعاون اور جدید ٹیکنالوجی کے شعبوں میں بڑھتے ہوئے تعلقات کی عکاسی کرتی ہے۔ اس مشن کے ذریعے پاکستانی ماہرین کو انسانی خلائی پرواز، سائنسی تجربات اور خلائی ماحول میں تحقیق کے حوالے سے عملی تجربات حاصل ہونے کی توقع ہے، جو مستقبل میں پاکستان کے خلائی منصوبوں کے لیے معاون ثابت ہو سکتے ہیں۔
پاکستانی خلا باز کی شمولیت نہ صرف قومی خلائی پروگرام کے لیے ایک اہم پیش رفت ہوگی بلکہ عالمی سطح پر پاکستان کی سائنسی اور تکنیکی سرگرمیوں میں شرکت کو بھی وسعت دے گی۔ شینزو 24 مشن پاک چین خلائی تعاون کو مزید مستحکم کرنے اور خلا کے پُرامن استعمال کے لیے مشترکہ کوششوں میں ایک نئے مرحلے کی بنیاد بن سکتا ہے۔

