ملتان سے آنے والی ایک مال بردار گاڑی سے لاکھوں مالیت کا مضر صحت مرغی کا گوشت برآمد
فوڈ اتھارٹی کی آپریشن ٹیم نے مال بردار گاڑی سے 2400کلو غیر صحت بخش گوشت پکڑ لیا
کوئٹہ (الفجرآن لائن) ڈی جی بلوچستان فوڈ اتھارٹی عتیق اللہ خان نے کہا ہے کہ کوئٹہ شہر کو مضر صحت گوشت سپلائی کی ایک اور بڑی کوشش ناکام بنادی گئی ہے بلوچستان فوڈ اتھارٹی کی خفیہ اطلاع پر خانوزئی ہائی وے پر کارروائی کرکے مبینہ طور پر ملتان سے آنے والی ایک مال بردار گاڑی سے لاکھوں مالیت کا مضر صحت مرغی کا گوشت برآمد۔اطلاع ملنے پر ڈپٹی ڈائریکٹر آپریشنز کی سربراہی میں آپریشن ٹیم نے مال بردار گاڑی سے 2400 کلو غیر صحت بخش گوشت پکڑ لیا۔بعدازاں ٹرک میں موجود چکن میٹ (گوشت) کے سیمپل لے کر لیبارٹری ٹیسٹ کیے گئے۔لیبارٹری رپورٹ کے مطابق پکڑا گیا لاکھوں مالیت کا گوشت انسانی استعمال کے لیے مضر صحت پایا گیا۔ مزید برآں بی ایف اے ٹیم کی نگرانی میں ناقص و غیر صحت بخش چکن میٹ کی بڑی مقدار شہر سے باہر محفوظ مقام پر تلف کردیا گیا۔ڈائریکٹر جنرل بی ایف اے کی ہدایت پر ناقص گوشت کی سپلائی میں ملوث عناصر کے خلاف مزید قانونی کارروائی شروع کردی گئی۔غیر معیاری گوشت سمیت ناقص خوراک کی فراہمی و سپلائی کے تدارک کے لیے اتھارٹی 24 گھنٹے متحرک ہے۔خوراک کے نام پر بیماریاں پھیلانے والوں کو کاروبار کی ہرگز اجازت نہیں دی جائے گی۔عوام تک معیاری خوراک کی فراہمی کو یقینی بنانے کے لئے اتھارٹی کی کارروائیاں مزید تیز کر دی گئیں ہیں۔
