چینی قیمتوں میں اضافہ برداشت نہیں کیا جائیگا، کیمرے لگا کر پیداواری عمل، ذخیرہ اندوزی پر نظر رکھی جائے، ملوں، ڈیلرز سے جی ایس ٹی کی 100 فیصد وصولی یقینی بنائی جائے، وزیراعظم کی ہدایت
اسلام آباد (الفجر آن لائن) وزیراعظم شہباز شریف نے شوگر سیکٹر میں سیلز ٹیکس چوری کا سدباب یقینی بنانے کی ہدایت کرتے ہوئے کہا ہے کہ چینی کی قیمتوں میں اضافہ کسی صورت برداشت نہیں کیا جائے گا،شوگر ملوں میں کیمرے لگا کر پیداواری عمل، ذخیرہ اندوزی پر نظر رکھی جائے، ملوں اور ڈیلرز سے جی ایس ٹی کی 100 فیصد وصولی یقینی بنائی جائے۔جاری نوٹیفکیشن کے مطابق وزیراعظم شہباز شریف نے ایف بی آر، ایف آئی اے اور آئی بی کو چینی کی فروخت پر ٹیکس چوری، غیر دستاویزی سیلز اور قیمتوں میں اضافے کی روک تھام کیلئے مشترکہ کارروائی کی ہدایت کرتے ہوئے کہا ہے کہ چینی کی قیمتوں میں اضافہ کسی صورت برداشت نہیں کیا جائے گا،شوگر کرشنگ سیزن شروع ہو رہا ہے، شوگر ملوں اور ڈیلرز سے جی ایس ٹی کی 100 فیصد وصولی کو یقینی بنایا جائے۔ وزیراعظم نے شوگر ملوں میں کیمرے نصب کا حکم دیتے ہوئے کہا کہ اس اقدام سے چینی کی ذخیرہ اندوزی نہیں ہو سکے گی اور قیمتوں میں توازن بھی برقرار رہے گا۔انہوں نے کہاحکم دیا کہ کیمروں کے ذریعے شوگر ملوں کے پیداواری عمل اور ذخیرہ اندوزی پر نظر رکھی جائے گی، ٹیکس چوری اور ذخیرہ اندوزی میں ملوث شوگر ملز مالکان کے خلاف سخت قانونی کارروائی کی جائے گی۔ وزیراعظم نے سٹیل، سگریٹ، سیمنٹ اور مشروبات سمیت دیگر شعبوں میں بھی اسی طرح کے اقدامات اٹھانے کی ہدایت کی۔
