اسلام آباد (الفجرآن لائن) پاکستان کی سیکیورٹی فورسز نے ملک دشمن عناصر کے خلاف کارروائیاں تیز کرتے ہوئے خیبرپختونخوا اور بلوچستان کے مختلف علاقوں میں مؤثر انٹیلی جنس بیسڈ آپریشنز کیے ہیں۔ ان کارروائیوں کے نتیجے میں فتنہ الخوارج اور فتنہ الہندوستان کے مجموعی طور پر 11 دہشتگرد ہلاک کر دیے گئے ہیں جبکہ ان کے محفوظ ٹھکانوں اور اسلحہ کے ذخائر کو بھی تباہ کر دیا گیا ہے۔
سیکیورٹی ذرائع کے مطابق خیبرپختونخوا کے ضلع بنوں میں خفیہ اطلاع پر کی گئی کارروائی کے دوران فتنہ الخوارج کے 2 دہشتگرد ہلاک ہوئے۔ فورسز نے کارروائی کے دوران دہشتگردوں کے ٹھکانے سے بھاری مقدار میں اسلحہ اور گولہ بارود برآمد کر لیا، جبکہ بارودی مواد کی مدد سے ان کی پناہ گاہ کو بھی مکمل طور پر مسمار کر دیا گیا۔
دوسری جانب جنوبی وزیرستان کے علاقے لدھا میں بھی سیکیورٹی فورسز نے ایک اور کامیاب آپریشن سرانجام دیا۔ ذرائع کا کہنا ہے کہ فورسز نے خوارج کے دہشتگردوں کی نقل و حرکت کا بروقت سراغ لگایا اور انہیں گھیرے میں لے کر مؤثر کارروائی کی، جس کے نتیجے میں 5 دہشتگرد مارے گئے۔
بلوچستان کے ضلع خضدار کے علاقے ساسول میں بھی سیکیورٹی فورسز نے فتنہ الہندوستان کے خلاف کارروائی کی۔ اس آپریشن میں جدید ترین ٹیکنالوجی یعنی کواڈ کاپٹر (ڈرونز) کا استعمال کیا گیا، جس کی مدد سے دہشتگردوں کو مؤثر انداز میں نشانہ بنا کر 4 شرپسندوں کو ہلاک کیا گیا۔ تمام آپریشنز کے دوران اس بات کو خاص طور پر یقینی بنایا گیا کہ مقامی آبادی اور شہریوں کے جان و مال کو کوئی نقصان نہ پہنچے۔
سیکیورٹی حکام کا کہنا ہے کہ یہ تمام کارروائیاں حکومت اور عسکری قیادت کے مشترکہ ‘عزمِ استحکام ویژن’ کے تحت کی جا رہی ہیں۔ ملک سے دہشتگردی کے ناسور کے مکمل خاتمے اور امن و امان کی بحالی تک سیکیورٹی فورسز کی جانب سے ملک دشمن عناصر کے خلاف بلا امتیاز کارروائیاں اسی عزم کے ساتھ جاری رہیں گی۔
