راولپنڈی (انٹرنیوز) سیکیورٹی فورسز نے تیراہ میں 7روز سے جاری آپریشن کے دوران خوارج سرغنہ سمیت 25 دہشت گردوں کو ہلاک کردیا، دہشت گردوں کی فائرنگ سے 4 سپاہی بھی شہید ہوگئے۔آئی ایس پی آر کی جانب سے جاری بیان کے مطابق سیکیورٹی فورسز نے ضلع خیبر کے علاقے تیراہ میں فتنہ الخوارج، نام نہاد لشکر اسلام اور جماعت الاحرار کیخلاف وسیع پیمانے پر انٹیلی جنس بیسڈ آپریشنز کیا جس کے نتیجے میں فتنہ الخوارج اور اس کے حامیوں کو بھاری نقصان پہنچا ہے۔بیان کے مطابق 20 اگست سے جاری جراتمندانہ اور کامیاب آئی بی اوز کے دوران سیکیورٹی فورسز نے اب تک 25 خوارج کو کامیابی سے ہلاک کیا جن میں خوارج کا سرغنہ ابوذر عرف صدام بھی شامل ہے، کارروائیوں میں 11 خوارج زخمی ہوئے ہیں۔
آئی ایس پی آر کے مطابق آپریشنز کے دوران 4بہادر سپاہیوں نے بہادری سے لڑتے ہوئے وطن کی حفاظت کیلئے اپنی جانوں کا نذرانہ پیش کیا اور شہادت کا رتبہ حاصل کیا۔بیان کے مطابق ان آپریشنز میں فتنہ الخوارج کو پہنچنے والا بھاری نقصان سیکیورٹی فورسز کے عزم اور دہشت گردی کے خاتمے کے عہد کا ثبوت ہے۔
