بلوچستان میں کوئی آپریشن نہیں ہو رہا، دہشت گردی پلاننگ کے تحت کی گئی، ایس سی او کانفرنس خراب کرنے کی کوشش کی جارہی ہے، معلوم ہے پیچھے کون ہے؟ سی ٹی ڈی بلوچستان کیلئے 8 ارب مختص کئے گئے ہیں، سینیٹ میں اظہار خیال
اسلام آباد (الفجرآن لائن) وفاقی وزیر داخلہ محسن نقوی نے واضح کیا ہے کہ ریاست کیخلاف بندوق اٹھانے والوں کا بندوبست کیا جائے گا، بلوچستان میں کوئی آپریشن نہیں ہو رہا، دہشت گردی پلاننگ کے تحت کی گئی، ایس سی او کانفرنس خراب کرنے کی کوشش کی جارہی ہے، معلوم ہے پیچھے کون ہے؟ سی ٹی ڈی بلوچستان کیلئے 8 ارب مختص کئے گئے ہیں۔
تفصیلات کے مطابق سینیٹ اجلاس میں اظہار خیال کرتے ہوئے وفاقی وزیر داخلہ محسن نقوی نے کہا کہ بلوچستان میں 26 اگست کو ہونیوالا واقعہ معمولی نہیں ہے،یہ کارروائی دو، تین گروپوں نے مل کر پوری پلاننگ کے تحت کی ہے، ہمیں معلوم ہے اس کے پیچھے کون ہے؟،شنگھائی تعاون تنظیم کانفرنس خراب کرنے کی کوشش کی جارہی ہے۔انہوں نے کہا کہ بہت سے لوگوں کو تکلیف ہے کہ ایس سی او نہ ہو مگر ہم اس کی میزبانی کریں گے۔ انہوں نے کہا کہ اپیکس کمیٹی نیشنل ایکشن پلان کو ریویو کرتی ہے، پارلیمنٹ سپریم ہے اور سپریم ہی رہے گی۔ انہوں نے کہاکہ بلوچستان میں کوئی آپریشن نہیں ہورہا،جو لوگ پاکستان کو مانتے ہیں انہیں سر پر بٹھائیں گے لیکن جو لوگ اسٹیٹ کو نہیں مانتے اور دہشت گرد ہیں ان کیخلاف کارروائی کی جائے گی۔ انہوں نے کہا کہ ریاست کیخلاف بندوق اٹھانے والوں کا بندوبست کیا جائے گا۔ انہوں نے کہا کہ وزیراعظم نے گزشتہ روز بلوچستان کی سی ٹی ڈی کیلئے 8ارب روپے مختص کئے ہیں، وہاں سب سے بڑا مسئلہ افسران کی عدم دستیابی ہے، وفاق سے افسران بلوچستان جارہے ہیں،30 سے 40 افسران کل وہاں پہنچ جائیں گے۔
