کوئٹہ(الفجرآن لائن)وزیراعلی بلوچستان سرفراز بگٹی نے کہا ہے کہ میٹرک میں اول آنے والے طالبعلموں کو حکومتی خرچ پر اعلی تعلیم دی جائے گی،بلوچستان سے جانے والے نوجوان اپنے ملک کا بہتر تشخص اجاگر کریں۔کوئٹہ میں یوتھ اسکل ڈویلپمنٹ کی تقریب سے خطاب کرتے ہوئے انہوں نے کہا کہ بلوچستان میں کسی کو آسامیاں بیچنے نہیں دیں گے،یوتھ اسکلز ڈویلپمنٹ پروگرام میں میرٹ کو یقینی بنائیں گے، ہر ضلع سے مساوی تعداد میں نوجوانوں کی سلیکشن ہوگی ۔سرفراز بگٹی نے کہا کہ ہم نوجوانوں کو ترقی کے مواقع فراہم کر رہے ہیں، دوسری طرف نوجوانوں کو خودکش بنایا جارہا ہے، فیصلہ بلوچستان کے عوام نے کرنا ہے کہ کون درست کون غلط ہے۔انہوں نے کہا کہ ترقی کا راستہ بلوچستان سے ہی نکلتا ہے، سوشل میڈیا پر بے بنیاد پراپیگنڈوں کے ذریعے گمراہی پھیلائی جاتی ہے، حکومت ضروریات اور منصوبوں کو کم کر کے نوجوانوں پر وسائل خرچ کر رہی ہے، بیڈ گورننس کا خاتمہ کر کے نوجوانوں کو ریاست سے نزدیک کریں گے۔
