دکانیں، مارکیٹس ،شاپنگ مالز 8بجے بند کرنے کا فیصلہ برقرار ،ریسٹورنٹس کی ان و آؤٹ ڈور ڈائننگ 10بجے تک ہوگی
لاہور(الفجر آن لائن) سموگ میں بہتری کے بعد لاہور سمیت 4 اضلاع میں تعمیراتی کام، دفاتر کو مکمل عملہ بلانے کی اجازت دے دی گئی۔ڈی جی ماحولیات پنجاب ڈاکٹر عمران حامد شیخ کی جانب سے جاری نوٹیفکیشن کے مطابق سموگ میں بہتری آنے کے بعد لاہور، گوجرانوالہ، ملتان اور فیصل آباد میں تعمیراتی کام کی اجازت دے دی گئی ہے جبکہ زگ زیگ ٹیکنالوجی والے بھٹے بھی کام کرسکیں گے۔نوٹیفکیشن میں کہا گیا ہے کہ سرکاری و نجی دفاترکو 100فیصد عملے کیساتھ کام کرنے کی اجازت ہوگی، دکانیں، مارکیٹس اور شاپنگ مالز 8بجے بند کرنے کا فیصلہ برقرار رکھا گیا ہے جبکہ ریسٹورنٹس کی ان ڈور اور آؤٹ ڈور ڈائننگ 10بجے تک ہوگی۔ نوٹیفکیشن کے مطابق ہیوی ٹریفک پیر سے جمعرات تک اضلاع میں داخل ہوسکے گی جب کہ جمعہ سے اتوار تک ہیوی ٹریفک کو داخلے کی اجازت نہیں ہوگی۔
