ماڑی منرلز نے ضلع چاغی میں تقریباً 1.4 مربع کلومیٹر رقبے پر پھیلے معدنی ذخائر کی نشاندہی کر دی، اب تک 25 ہزار میٹر ڈرلنگ مکمل، مزید ایک ہزار میٹر ڈرلنگ کے بعد ذخائر کے حجم اور معاشی اہمیت کا تعین ہوگا
کوئٹہ (الفجرآن لائن) بلوچستان کے ضلع چاغی میں سونے اور تانبے کے نئے ذخائر دریافت ہونے کا انکشاف ہوا ہے۔ ماڑی انرجیز نے پاکستان اسٹاک ایکسچینج کو ارسال کردہ خط میں معدنی ذخائر کی دریافت اور جاری تلاش کے عمل سے متعلق تفصیلات جاری کر دی ہیں، جس کے مطابق کمپنی کی ذیلی کمپنی ماڑی منرلز نے ضلع چاغی میں معدنیات کی تلاش کے دوران سونے اور تانبے کے ذخائر کی نشاندہی کی ہے۔
کمپنی کے مطابق متعلقہ علاقے میں معدنی ذخائر کی تلاش کے لیے اب تک مجموعی طور پر 25 ہزار میٹر ڈرلنگ کا کام مکمل کیا جا چکا ہے، جبکہ دریافت ہونے والی معدنیات تقریباً 1.4 مربع کلومیٹر کے رقبے پر پھیلی ہوئی ہیں۔ اس پیش رفت کو بلوچستان میں معدنی وسائل کی تلاش کے حوالے سے اہم قرار دیا جا رہا ہے۔
ماڑی انرجیز کے مطابق دریافت شدہ ذخائر کے اصل حجم، معیار اور معاشی اہمیت کا درست اندازہ لگانے کے لیے مزید ایک ہزار میٹر گہرائی تک ڈرلنگ کی جائے گی۔ اس مرحلے کی تکمیل کے بعد معدنی ذخائر کی مجموعی مقدار اور ان سے ممکنہ معاشی فوائد کا تعین کیا جا سکے گا۔
کمپنی کا کہنا ہے کہ منصوبے کے تحت معدنیات کی تلاش اور کھدائی کے مزید تفصیلی نتائج 2027 کی پہلی سہ ماہی میں سامنے آنے کی توقع ہے۔ ان نتائج کی روشنی میں منصوبے کے آئندہ مراحل اور مزید پیش رفت سے متعلق فیصلے کیے جائیں گے۔
ضلع چاغی میں سونے اور تانبے کے ذخائر کی دریافت بلوچستان کے معدنی وسائل سے متعلق جاری تلاش کی سرگرمیوں میں ایک اہم پیش رفت ہے، تاہم ان ذخائر کی حتمی مقدار، معیار اور تجارتی افادیت کا تعین مزید ڈرلنگ اور تکنیکی جائزوں کے بعد ہی ممکن ہوگا۔
