شہریوں کی جان و مال اور پولیس پر حملہ کرنے والے قانون کی گرفت سے نہیں بچ سکتے، سی پی او خالد ہمدانی
راولپنڈی (الفجر آن لائن) ٹیکسلا میں مبینہ پولیس مقابلے کے دوران کار چوری کر کے فرار ہونیوالا ملزم ہلاک ہوگیا ۔ پولیس کے مطابق تھانہ ٹیکسلا کے علاقے میں پولیس ٹیم پیٹرولنگ پر تھی کہ مشکوک کار سوار کو چیکنگ کیلئے روکنا چاہا جس پر اس نے گاڑی بھگا دی ،پولیس نے تعاقب کیا تو سواروں نے پولیس ٹیم پر فائرنگ کی، کراس فائرنگ کے نتیجے میں نسیم خان نامی ملزم ہلاک ہوگیا جبکہ ساتھی فرار ہوگیا۔
پولیس نے ہلاک ہونے والے ملزم کی لاش پوسٹمارٹم کیلئے ہسپتال منتقل کرکے گاڑی اور اسلحہ قبضے میں لے لیا۔ حکام کے مطابق ملزم قتل، ڈکیتی اور کار چوری کے متعدد مقدمات میں ریکارڈ یافتہ جبکہ ڈکیتی مع قتل کے مقدمات میں اشتہاری بھی تھا۔اطلاع پر سینئر پولیس افسران پولیس نفری کے ہمراہ موقع پر پہنچے، فرار ملزم کی گرفتاری کیلئے تلاش شروع کر دی ہے۔دوسری جانب سی پی او سید خالد ہمدانی نے پولیس ٹیم کی کارکردگی کو سراہتے ہوئے کہاہے کہ شہریوں کی جان و مال اور پولیس پر حملہ کرنے والے قانون کی گرفت سے نہیں بچ سکتے۔
