راولپنڈی (الفجرآن لائن) خیبرپختونخوا میں امن و امان کے قیام اور فتنہ الخوارج کے مکمل خاتمے کے لیے سیکیورٹی فورسز کی انٹیلی جنس بیسڈ کارروائیاں تیز کر دی گئی ہیں۔ عزمِ استحکام ویژن کے تحت گزشتہ دو ماہ سے جاری ان مؤثر آپریشنز میں فورسز کو بڑی کامیابیاں حاصل ہوئی ہیں۔ حالیہ کارروائی کے دوران شمالی وزیرستان میں دہشت گردوں کے نیٹ ورک کو شدید نقصان پہنچایا گیا ہے۔
سیکیورٹی ذرائع کے مطابق فورسز نے شمالی وزیرستان کے علاقے کھٹی کلی میں دہشت گردوں کی موجودگی کی خفیہ اطلاع پر ایک منظم آپریشن کیا۔ اس کارروائی کے دوران سیکیورٹی فورسز اور خوارج کے درمیان شدید فائرنگ کا تبادلہ ہوا، جس کے نتیجے میں فتنہ الخوارج کے متعدد دہشت گرد جہنم واصل ہو گئے جبکہ کئی کے شدید زخمی ہونے کی بھی اطلاعات ہیں۔
ذرائع کا مزید کہنا ہے کہ آپریشن کے دوران سیکیورٹی فورسز نے خوارج کے متعدد خفیہ ٹھکانوں کو کامیابی سے تباہ کر دیا ہے۔ ہلاک ہونے والے دہشت گردوں کے قبضے سے بھاری مقدار میں جدید اسلحہ، خودکار ہتھیار، گولہ بارود اور دیگر عسکری سامان بھی برآمد کیا گیا ہے، جسے فورسز نے اپنے قبضے میں لے لیا ہے۔
سیکیورٹی حکام نے واضح کیا ہے کہ ان حساس آپریشنز کے دوران مقامی آبادی اور معصوم شہریوں کے جان و مال کے تحفظ کو ہر ممکن حد تک یقینی بنایا جا رہا ہے تاکہ مقامی لوگوں کو کوئی نقصان نہ پہنچے۔ سیکیورٹی فورسز کا عزم ہے کہ خیبر پختونخوا میں پائیدار امن کے قیام اور دہشت گردی کے جڑ سے خاتمے تک یہ ٹارگیٹڈ کارروائیاں بلا امتیاز جاری رہیں گی
