سوات (الفجرآن لائن) سوات میں سیکیورٹی کی موجودہ صورتحال کے پیشِ نظر پاک فوج اور خیبرپختونخوا پولیس کی جانب سے شہر کی اہم شاہراہوں پر مشترکہ پٹرولنگ اور ایک پروقار فلیگ ریلی کا انعقاد کیا گیا ہے۔ اس مشترکہ گشت کا بنیادی مقصد علاقے میں امن و امان کی فضا کو برقرار رکھنا، مقامی آبادی میں احساسِ تحفظ کو مزید مضبوط کرنا اور باہمی اعتماد کو فروغ دینا ہے۔ سیکیورٹی گاڑیوں اور موٹر سائیکلوں پر مشتمل اس قافلے نے شہر کے مختلف حصوں کا چکر لگا کر ملک دشمن عناصر کو واضح اور سخت پیغام دیا۔
اس فلیگ ریلی میں سوات کے شہریوں، بزرگوں، نوجوانوں اور بچوں کی ایک بڑی تعداد نے شرکت کی اور سیکیورٹی فورسز کے ساتھ کندھے سے کندھا ملا کر کھڑے ہونے کے عزم کا اعادہ کیا۔ شرکاء نے ہاتھوں میں قومی پرچم تھام رکھے تھے اور فضا "پاکستان زندہ باد” اور "پاک آرمی زندہ باد” کے پُرجوش اور فلک شگاف نعروں سے گونجتی رہی۔ عوامی سطح پر فورسز کے لیے اس طرح کی بھرپور حمایت اس بات کا ثبوت ہے کہ مقامی آبادی خطے میں پائیدار امن کی خواہاں ہے۔
مقامی رہنماؤں اور سیکیورٹی حکام کا کہنا ہے کہ عوام، پاک فوج اور پولیس کا یہ مثالی اتحاد کسی بھی چیلنج کا مقابلہ کرنے کے لیے تیار ہے۔ یہ ہم آہنگی اور مشترکہ عزم سوات میں نہ صرف پائیدار امن اور استحکام کی ضمانت ہے بلکہ یہ کسی بھی شرپسند قوت کو خطے کا امن تباہ کرنے کی اجازت نہیں دے گا۔
