راولپنڈی(الفجرآن لائن) آئی ایس پی آر کے مطابق کویت کے وزیرِ دفاع عزت مآب شیخ عبداللہ علی عبداللہ السالم الصباح کی سربراہی میں ایک اعلیٰ سطحی وفد نے جنرل ہیڈ کوارٹرز (جی ایچ کیو) راولپنڈی کا دورہ کیا۔ وفد میں کویتی مسلح افواج کے چیف آف جنرل اسٹاف لیفٹیننٹ جنرل خالد درج سعد الشریعان بھی شامل تھے۔ وفد نے چیف آف آرمی اسٹاف و چیف آف ڈیفنس فورسز (سی ڈی ایف) فیلڈ مارشل سید عاصم منیر سے اہم ملاقات کی۔ملاقات کے دوران باہمی دلچسپی کے امور، علاقائی سیکیورٹی کی صورتحال اور دوطرفہ دفاعی تعاون کو مزید فروغ دینے پر تفصیلی تبادلہ خیال کیا گیا۔
دونوں ممالک کی قیادت نے ادارہ جاتی روابط کو مضبوط بنانے اور دفاعی شعبے میں باہمی طور پر فائدہ مند تعاون کو وسعت دینے کے عزم کا اعادہ کیا۔ کویتی وفد نے علاقائی امن اور استحکام کے لیے پاک فوج کی پیشہ ورانہ صلاحیتوں، آپریشنل مہارت اور گراں قدر خدمات کو سراہا۔ اس اہم ملاقات نے دونوں برادر ممالک کے تاریخی اور اسٹریٹجک تعلقات کو ایک پائیدار دفاعی شراکت داری میں بدلنے کے مشترکہ عزم کو مزید تقویت دی ہے۔
