گوگل ڈیپ مائنڈ کے جدید اے آئی نظام AlphaProof Code نے سگنل کے انکرپشن سافٹ ویئر کی اہم حفاظتی خصوصیات کی مشین کے ذریعے تصدیق کردی، تحقیق میں 65 لاکھ سے زائد لائنوں پر مشتمل ریاضیاتی ثبوت تیار کیے گئے۔
امریکا (الفجرآن لائن) مصنوعی ذہانت اور سائبر سکیورٹی کے شعبے میں ایک اہم پیش رفت سامنے آئی ہے جہاں گوگل ڈیپ مائنڈ کے محققین نے جدید اے آئی نظام AlphaProof Code کی مدد سے معروف میسجنگ ایپ سگنل کے سکیورٹی پروٹوکول کی اہم خصوصیات کی ریاضیاتی تصدیق کرلی ہے۔
گوگل ڈیپ مائنڈ کی 10 نومبر 2026 کو جاری کردہ تحقیق کے مطابق AlphaProof Code ایک ایسا جدید اے آئی فریم ورک ہے جو مختلف مصنوعی ذہانت کے ایجنٹس کی مدد سے سافٹ ویئر کے حفاظتی نظاموں کا تجزیہ کرتا اور ان کی درستگی کے ریاضیاتی ثبوت تیار کرتا ہے۔
تحقیق کے دوران اس نظام کو سگنل کے ریفرنس سافٹ ویئر libsignal پر آزمایا گیا، جس کے نتیجے میں تقریباً 65 لاکھ لائنوں پر مشتمل Lean نامی رسمی ریاضیاتی زبان میں ثبوت تیار کیے گئے۔ ان ثبوتوں کو ایک خصوصی تصدیقی نظام کے ذریعے جانچا گیا تاکہ یہ یقینی بنایا جا سکے کہ پیش کردہ نتائج منظور شدہ تکنیکی وضاحتوں کے مطابق ہیں۔
تحقیق میں سگنل کے دو اہم حفاظتی نظاموں PQXDH Handshake اور Triple Ratchet کی جانچ کی گئی۔ ان نظاموں کا بنیادی مقصد پیغامات کی رازداری برقرار رکھنا، صارفین کی شناخت کی تصدیق کرنا اور اس صورت میں بھی مواصلات کو محفوظ رکھنا ہے جب کسی صارف کی سکیورٹی کیز کسی وقت متاثر ہو جائیں۔
گوگل ڈیپ مائنڈ کے مطابق یہ پہلی مرتبہ ہے کہ مصنوعی ذہانت کی مدد سے کسی بڑے پیمانے پر استعمال ہونے والے کرپٹوگرافک پروٹوکول کے اصل کمپائل شدہ سافٹ ویئر کو اس گہرائی میں ریاضیاتی طور پر جانچا گیا ہے۔ اس تحقیق میں نظام کو چار ہفتوں کے اندر ایسے ثبوت تیار کرنے میں کامیابی ملی جس کے لیے روایتی طریقوں سے ماہرین کو کئی سال درکار ہو سکتے تھے۔
محققین نے نظام کی صلاحیت جانچنے کے لیے سگنل سافٹ ویئر کے دو ایسے پرانے نقائص بھی دوبارہ شامل کیے جنہیں پہلے ہی درست کیا جا چکا تھا۔ اے آئی نظام نے ان خامیوں کو شناخت کیا اور ریاضیاتی طور پر ثابت کیا کہ متاثرہ سافٹ ویئر مطلوبہ حفاظتی معیار پر پورا نہیں اترتا۔
ماہرین کے مطابق یہ پیش رفت مستقبل میں بینکنگ، سرکاری اداروں، طبی آلات، مالیاتی نظاموں اور حساس ڈیجیٹل معلومات کے تحفظ کے لیے انتہائی اہم ثابت ہو سکتی ہے۔ تاہم گوگل نے واضح کیا ہے کہ تحقیق میں سگنل ایپ کے تمام حصوں کی جانچ نہیں کی گئی بلکہ مخصوص کرپٹوگرافک خصوصیات کی تصدیق کی گئی ہے۔
کمپنی نے تحقیق سے متعلق تکنیکی مواد اور ثبوت عوامی طور پر دستیاب کرنے کا بھی اعلان کیا ہے تاکہ دنیا بھر کے محققین اور سافٹ ویئر ڈویلپرز اس ٹیکنالوجی کو مزید بہتر بنانے کے لیے استعمال کر سکیں۔

