پاکستان کی طرف اٹھنے والی ہر آنکھ کو نوچ لیں گے، بھارت ہوش کے ناخن لے، بہتر ہے مل بیٹھ کر تنازعات حل کریں، بھارت ذہن نشین کر لے وہ کبھی فلسطین کی طرح کشمیر کو اپنا حصہ نہیں بناسکے گا، وزیراعظم کا تقریب سے خطاب
مظفر آباد (الفجرآن لائن) وزیراعظم شہباز شریف نے بھارت کو مسئلہ کشمیر پر پھر مذاکرات کی دعوت دیتے ہوئے کہا ہے کہ پاکستان کی طرف اٹھنے والی ہر آنکھ کو نوچ لیں گے، بھارت ہوش کے ناخن لے، بہتر ہے مل بیٹھ کر تنازعات حل کریں، بھارت ذہن نشین کر لے وہ کبھی فلسطین کی طرح کشمیر کو اپنا حصہ نہیں بناسکے گا۔
تفصیلات کے مطابق یوم استحصال کشمیر کے موقع پر آزاد جموں و کشمیر قانون ساز اسمبلی کے خصوصی اجلاس سے ویڈیو لنک پر خطاب کرتے ہوئے وزیراعظم شہباز شریف نے کہا کہ کہا کہ آج کے دن بھارتی حکومت نے غاصبانہ طور پر مقبوضہ جموں وکشمیر میں کشمیریوں کے حقوق کو چھین کر،آرٹیکل 370 کا خاتمہ کرکے غیر ریاستی لوگوں کو آباد ہونے کا غیرقانونی حق دیا۔ انہوں نے کہا کہ مقبوضہ کشمیر میں آزادی کا حق مانگنے والے لاکھوں، کروڑوں کشمیروں کے ساتھ پچھلے 77 سال سے یہ ظلم روا رکھا گیا ہے، جب تک کشمیریوں کو بنیادی حقوق مہیا نہیں ہوجاتے پاکستان ہمیشہ ان کی اخلاقی مدد کرتا رہے گا اور عالمی اداروں کے دروازے پر دستک دیتا رہے گا۔
انہوں نے کہا کہ وہ دن آئے گا جب مقبوضہ کشمیر کے عوام بھارت کے غاصبانہ قبضے سے آزاد ہوں گے اور ہم سجدہ شکر ادا کریں گے۔ انہوں نے کہا کہ لاکھوں کشمیریوں نے آزادی کیلئے اپنی جانوں کا نذرانہ پیش کیا، آج ہم ان کی عظیم قربانیوں کو سراہتے ہیں اور وعدہ کرتے ہیں کہ کبھی بھی ان کی قربانی سے گریز نہیں کیا جائے گا۔انہوں نے کہا کہ بھارت ہوش کے ناخن لے وہ پاکستان کی آنکھوں میں آنکھیں ڈال کر بات نہیں کرسکتا، پاکستان کی طرف اٹھنے والی ہر آنکھ کو پاؤں تلے روند دیں گے اور نوچ لیں گے، لہٰذا دانش مندی کا تقاضا اور امن کا راستہ یہی ہے کہ مل بیٹھ کر نہ صرف کشمیریوں کو ان کا حق خودارادیت فراہم بلکہ خطے میں امن قائم کیا جائے، اس کے علاوہ اور کوئی راستہ نہیں، باقی تمام راستے تباہی کی طرف جاتے ہیں۔انہوں نے کہا کہ غزہ میں اسرائیلی دہشت گردی کی شدید مذمت کرتے ہیں، تاریخ میں اس سے بدترین مثال نہیں ملتی، آج فلسطینی اور کشمیری بہن بھائیوں کی قربانیں یکساں ہیں جو ضرور تنگ لائیں گی۔ انہوں نے کہا کہ ایران میں حماس رہنماء اسماعیل ہنیہ کو شہید کیا گیا جس پر پاکستان میں سوگ منایا گیا اور بھرپور مذمت کی گئی۔ انہوں نے کہا کہ بھارت یہ بات ذہن میں رکھ لے وہ کبھی فلسطین کی طرح کشمیر کو اپنا حصہ نہیں بناسکے گا، وہ جتنا ظلم ڈھالے اسرائیل بن نہیں سکے گا، وہ دن آئے گا جب اسرائیل و بھارت کو ان کے مظالم کا حساب دینا پڑے گا اور دونوں قوموں کو آزادی دینی پڑے گی۔
