الیکشن کمیشن،رجسٹرڈ سیاسی جماعتوں،سربراہان کی نئی فہرست جاری

نواز شریف کا نام بطور صدر مسلم لیگ(ن) شامل،چیئرمین پی ٹی آئی کا نام اپ ڈیٹ نہ ہوسکا

اسلام آباد (الفجرآن لائن)الیکشن کمیشن نے رجسٹرڈ سیاسی جماعتوں اور سربراہان کی نئی فہرست جاری کردی۔ تفصیلات کے مطابق الیکشن کمیشن نے رجسٹرڈ سیاسی جماعتوں اور سربراہان کی اپ ڈیٹ فہرست جاری کردی ہے جس کے مطابق الیکشن کمیشن میں 166 سیاسی جماعتیں رجسٹرڈ ہیں۔الیکشن کمیشن نے نواز شریف کا نام بطور صدر مسلم لیگ(ن)، جماعت اسلامی کے امیر نعیم الرحمن خان کا نام بطور پارٹی سربراہ، محمود خان کا نام بطور چیئرمین پی ٹی آئی پارلیمنٹرین اپ ڈیٹ کیا ہے۔

نئی فہرست میں صدر آصف زرداری کا نام بطور صدر پاکستان پیپلز پارٹی پارلیمنٹرین،بلاول بھٹو زرداری کا نام بطور چیئرمین پاکستان پیپلز پارٹی شامل ہے۔ اسفندیار ولی خان کا نام تاحال بطور صدر عوامی نیشنل پارٹی موجود ہے جبکہ پاک سر زمین پارٹی بھی رجسٹرڈ جماعتوں کی فہرست میں شامل ہے۔الیکشن کمیشن فہرست میں چیئرمین پی ٹی آئی کا نام تاحال اپ ڈیٹ نہیں کیا گیا ہے۔