راولپنڈی (الفجرآن لائن) اے این ایف نے ملک گیر 10 کارروائیوں میں 4 من سے زائد منشیات برآمد کر کے خاتون سمیت 8 ملزمان کو گرفتار کرلیا۔ تفصیلات کے مطابق اے این ایف نے گزشتہ 24گھنٹوں کے دوران منشیات فروشوں و منشیات سمگلنگ کیخلاف ملک گیر 10کارروائیوں میں اڑھائی کروڑروپے مالیت کی168 کلو منشیات برآمد کر کے خاتون سمیت 8ملزمان کو گرفتار کرلیا۔
ترجمان کے مطابق ایچ الیون اسلام آباد میں یونیورسٹی کے قریب 2 ملزمان سے مجموعی طور پر 700 گرام چرس برآمدکی گئی،سیالکوٹ میں یونیورسٹی کے قریب موٹر سائیکل سوار ملزم سے 200 گرام چرس، 200 گرام آئس اور 150 گرام ایکسٹیسی گولیاں،سیالکوٹ میں ہی تعلیمی ادارے کے قریب رکشہ سے 8.4 کلوگرام چرس برآمدکرکے خاتون سمیت 2 ملزمان کو گرفتارکیا گیا،ملزمان کی نشاندہی پر شیخوپورہ میں واقع گھر سے مزید 10.8 کلو گرام افیون اور 54 کلوگرام چرس برآمدکی گئی۔ترجمان کے مطابق گرفتار ملزمان نے تعلیمی اداروں کے طلباء کو منشیات فروختگی کا اعتراف کیا ہے۔ اسی طرح پشاور ایئرپورٹ پر دو مختلف کارروائیوں میں بحرین اور دوحہ جانیوالے مسافروں سے 2.1 کلوگرام آئس،کراچی ایئرپورٹ پر جدہ جانیوالے مسافر کے بیگ سے 994 گرام آئس،کراچی میں واقع کوریئر آفس میں پشاور سے بھیجے گئے پارسل سے 4.7 کلوگرام چرس،پسنی میں کوسٹل لائن کے قریب 60 کلوگرام چرس برآمدکی گئی ہے۔ترجمان کے مطابق گرفتار ملزمان کیخلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
