نان فائلرز کے بیرون ملک جانے پر پابندی،موبائل سمز، بجلی و گیس کنکشن منقطع،پراپرٹی و گاڑی کی خرید و فروخت پر پابندی لگانے پر غور
اسلام آباد (الفجرآن لائن)ایف بی آر نے یکم اکتوبر سے نان فائلرز کیخلاف سخت کارروائی کا فیصلہ کرلیا جس کے تحت نان فائلرز کے بیرون ملک جانے پر پابندی،موبائل سمز، بجلی و گیس کنکشن منقطع،پراپرٹی و گاڑی کی خرید و فروخت پر پابندی لگانے پر غور شروع کردیا گیا ہے۔
اطلاعات کے مطابق ایف بی آر نے تقریباً 13 ہزار ارب روپے سالانہ ٹیکس ہدف پورا کرنے کیلئے یکم اکتوبر سے نان فائلرز کیخلاف سخت کریک ڈاؤن کرنے کا فیصلہ کیا ہے، مہم کے تحت لاکھوں نان فائلرز کو حتمی ٹیکس نوٹس جاری کئے جائیں گے۔ذرائع کے مطابق نان فائلرز کے بیرون ملک جانے پر پابندی، موبائل سمز، بجلی و گیس کنکشن منقطع کرنے کی حکمت عملی تیار کر لی گئی جبکہ نان فائلرز کی جانب سے پراپرٹی اور گاڑی کی خرید و فروخت پر پابندی کی تجویز بھی زیرغورہے۔ایف بی آر کے مطابق ریٹیل، ہول سیل، ٹرانسپورٹ، ریئل اسٹیٹ، تعمیرات، صحت اور تعلیم سمیت 10بڑے شعبوں سے ٹیکس وصول کرنے کا پلان بنایا گیا ہے، ایف بی آرکے پاس شہریوں کی ٹرانزیکشن کا مکمل ریکارڈ موجود ہے، ٹیکس چوری یا غلط معلومات کی صورت میں بھاری جرمانہ عائد کیا جائے گا۔ ایف بی آر کے مطابق 30ستمبر 2024ء تک انکم ٹیکس گوشوارے جمع نہ کرانے والوں سے دگنا ود ہولڈنگ ٹیکس وصول کیا جائے گا۔
