لندن (الفجرآن لائن) برطانیہ نے 142 سال بعد کوئلے سے بجلی کی پیداوار بند کردی۔ غیر ملکی میڈیا کے مطابق برطانیہ نے 142 سال تک کوئلے سے بجلی بنانے کے بعد کول پاور پلانٹس سے بجلی کی پیداوار بند کردی ہے۔برطانوی وزیر پاور مائیکل شینک نے بتایا ہے کہ ریٹ کلف میں ملک کے آخری کول پاور اسٹیشن نے گزشتہ روز اپنا آپریشن بند کردیا ہے،فیصلے سے ہم نے ماحولیاتی تبدیلیوں سے نمٹنے کیلئے برطانیہ کے عزم کے حصول میں ایک اہم سنگ میل عبور کرلیا ہے۔انہوں نے کہا کہ کوئلہ سب سے زیادہ گرین ہاؤس گیس پیدا کرنیوالا خطرناک فوسل فیول تھا۔ انہوں نے کہا کہ برطانیہ کوئلے سے بجلی پیدا کرنے والا پہلا ملک تھا اور برطانیہ ہی کل کوئلے سے بجلی کی پیداوار ترک کرنے والا دنیا کا پہلا ملک بن جائے گا۔واضح رہے کہ دنیا کا سب سے پہلا کول پاور اسٹیشن نامور مؤجد تھامس ایڈیسن نے 1882ء میں لندن میں قائم کیا تھا جس کے بعد 20 ویں صدی تک برطانیہ کی 100فیصد بجلی کوئلے سے ہی پیدا کی جاتی رہی،برطانیہ میں 1990ء سے بجلی کی پیداوار کیلئے کوئلے کی جگہ گیس کا استعمال عمل میں آیا تاہم کول پاور پھر بھی بنیادی حیثیت کا حامل رہا، 2012 ء تک برطانیہ میں 39 فیصد بجلی کول پاور اسٹیشنز ہی پیدا کرتے رہے ہیں۔
