عراق، اردن، مالدیپ، سری لنکا،نیپال، فلسطین، سوڈان،یمن سمیت کئی دوست ممالک کے کیڈٹس نے گریجویشن کیا، آئی ایس پی آر
راولپنڈی (الفجرآن لائن) پاکستان ملٹری اکیڈمی کاکول میں مختلف کورسز مکمل کرنیوالے کیڈٹس کی شاندار پاسنگ آؤٹ پریڈ کا انعقاد کیاگیا۔آئی ایس پی آر کے مطابق پاکستان ملٹری اکیڈمی کاکول میں 150ویں پی ایم اے لانگ کورس کے کیڈٹس کی پاسنگ آؤٹ پریڈ ہوئی جس میں 69ویں انٹیگریٹڈ کورس، 24ویں لیڈی کیڈٹ کورس اور 36ویں ٹیکنیکل گریجویٹ کورس کے کیڈٹس پاس آؤٹ ہوئے۔آئی ایس پی آر کے مطابق پاسنگ آؤٹ پریڈ کے مہمان خصوصی چیئرمین جوائنٹ چیف آف سٹاف کمیٹی جنرل ساحر شمشاد مرزا نے پریڈ کا جائزہ لیا اور کیڈٹس کو ایوارڈ دئیے۔آئی ایس پی آر کے مطابق پاکستان ملٹری اکیڈمی سے عراق، اردن، مالدیپ، سری لنکا،نیپال، فلسطین، سوڈان اور یمن سمیت کئی دوست ممالک کے کیڈٹس نے گریجویشن کیا۔بیان کے مطابق سینئر انڈر افسر عبداللہ افضل کو اعزازی تلوار سے نوازا گیا جبکہ سینئر انڈر افسربابر اللہ امان کو صدارتی گولڈ میڈل عطاء کیا گیا، چیئرمین جوائنٹ چیفس آف سٹاف کمیٹی اوورسیز گولڈ میڈل دوست ملک نیپال سے سینئر انڈر آفیسر کشتیج گرونگ کو عطاء کیا گیا۔آئی ایس پی آر کے مطابق چیف آف آرمی سٹاف کین 36ویں ٹیکنیکل گریجویٹ کورس کے جونیئر انڈر آفیسر محمد عمر شیراز کو عطاء کی گئی، 69ویں انٹیگریٹڈ کورس کے جونیئر انڈر افسر محمد سلیمان اور 24ویں لیڈی کیڈٹ کورس کی انڈر افسرپاکیزہ یعقوب کو کمانڈنٹ کینز سے نوازا گیا۔آئی ایس پی آر کے مطابق پریڈ میں پاس آؤٹ ہونیوالی کیڈٹس نے پرجوش انداز میں ڈرل کی مہارت کا مظاہرہ کیا جبکہ پاسنگ آؤٹ پریڈ میں ملکی وغیر ملکی مندوبین اور کیڈٹس کے اہلخانہ نے بھی شرکت کی۔
