سیکیورٹی فورسز،قانون نافذ کرنیوالے ادارے دہشت گردی کے خاتمے کیلئے پرعزم،گھناؤنے عمل کے ذمہ داروں کو انصاف کے کٹہرے میں لایا جائے گا، آئی ایس پی آر
راولپنڈی(الفجر آن لائن) بنوں میں سیکیورٹی فورسزکی مشترکہ چیک پوسٹ پر حملے کی کوشش کرنیو الے دہشت گردوں کیساتھ فائرنگ تبادلے میں 12جوان شہید جبکہ6 خوراج ہلاک ہوگئے۔آئی ایس پی آر کے مطابق 19نومبر کو خوارج نے ضلع بنوں کے علاقے ملی خیل میں سیکیورٹی فورسز کی ایک مشترکہ چیک پوسٹ پر حملہ کرنے کی کوشش کی،اس دوران فائرنگ تبادلے میں 6خوارج جہنم واصل ہوگئے۔
بیان کے مطابق سیکیورٹی فورسز کی موثر مزاحمت کے باعث خوارج چیک پوسٹ میں داخل نہیں ہوسکے جس پر انہوں نے بارود سے بھری گاڑی کو چیک پوسٹ کی بیرونی دیوار سے ٹکرا دیا، خودکش دھماکے کے نتیجے میں دیوار کا ایک حصہ گر گیا اور ارد گرد کا انفرا اسٹرکچر متاثر ہوگیا جبکہ 12بہادر سپوت شہید ہوگئے، جن میں 10سکیورٹی فورسز کے جوان اور ایف سی کے 2اہلکار شامل ہیں۔ترجمان پاک فوج کے مطابق علاقے میں کلیئرنس آپریشن جاری ہے، پاکستان کی سیکیورٹی فورسز اور قانون نافذ کرنیوالے ادارے دہشت گردی کے خاتمے کیلئے پرعزم ہیں،بہادر جوانوں کی قربانیاں ہمارے عزم کو مزید مضبوط کرتی ہیں،گھناؤنے عمل کے ذمہ داروں کو انصاف کے کٹہرے میں لایا جائے گا۔
