وفاقی حکومت نے پاکستان میں مقیم پروف آف رجسٹریشن (پی او آر) کارڈ رکھنے والے افغان مہاجرین کو اب مزید توسیع نہ دینے کا فیصلہ کر لیا ہے۔
تفصیلات کے مطابق یہ بات وفاقی وزیر داخلہ محسن نقوی نے صحافیوں سے غیر رسمی گفتگو کے دوران کہی۔ محسن نقوی نے بتایا کہ غیرقانونی طور پر مقیم افغان شہریوں کے خلاف سخت کارروائی کی جائے گی اور جن افغانیوں کو پاکستان سے نکالا گیا ہے، انہیں بلیک لسٹ بھی کیا جائے گا تاکہ وہ دوبارہ پاکستان داخل نہ ہو سکیں۔
انہوں نے مزید کہا کہ ایران نے صرف 10 دنوں کے اندر 3 لاکھ سے زائد افغان مہاجرین کو ملک بدر کیا، پاکستان بھی اب اسی طرز پر مؤثر اقدامات کر رہا ہے۔
وفاقی وزیر نے وضاحت کی کہ افغانستان ایک برادر اسلامی ملک ہے اور دونوں ممالک کے درمیان مختلف امور پر بات چیت جاری ہے، تاہم پاکستان میں کسی غیر ملکی کو غیرقانونی طور پر رہنے کی اجازت نہیں دی جائے گی۔
حکومتی فیصلے کے مطابق، پی او آر کارڈ کی مدت میں توسیع کا عمل بند کر دیا گیا ہے اور مرحلہ وار افغان مہاجرین کی واپسی کا عمل تیز کیا جا رہا ہے۔
