جنوبی افریقہ(ویب ڈیسک) جنوبی افریقہ کے ابھرتے ہوئے اسٹار فٹ بالر اور ممیلوڈی سن ڈاؤنز کے مڈفیلڈر جیدن ایڈمز 25 برس کی عمر میں اچانک انتقال کر گئے۔ ساؤتھ افریقن فٹ بال پلیئرز یونین نے ہفتے کے روز اس دلدوز خبر کی تصدیق کی، جس سے دنیا بھر کے فٹ بال پرستار گہرے صدمے میں ہیں۔ یہ افسوسناک واقعہ فیفا ورلڈ کپ 2026 میں جنوبی افریقہ کی تاریخی مہم کے چند ہفتوں بعد ہی پیش آیا ہے۔
مقامی حکام کے مطابق جیدن ایڈمز کی لاش کیپ ٹاؤن کے علاقے شاٹسچے کلوف میں ایک رہائشی مکان سے ملی۔ پولیس نے واقعے کی وجوہات جاننے کے لیے باقاعدہ تحقیقات کا آغاز کر دیا ہے، تاہم تاحال موت کی حتمی وجہ سامنے نہیں آسکی ہے۔ جنوبی افریقہ کے وزیر برائے کھیل، فن اور ثقافت گیٹن میک کینزی نے میڈیا اور عوام سے اپیل کی ہے کہ وہ سوگوار خاندان کے احترام میں کسی بھی قسم کی قیاس آرائیوں سے گریز کریں۔
جیدن ایڈمز کے انتقال پر فٹ بال کی عالمی تنظیم فیفا کے صدر گیانی انفانٹینو سمیت دنیا بھر کی معروف شخصیات نے گہرے دکھ کا اظہار کیا ہے۔ فیفا ورلڈ کپ کے کوارٹر فائنل میچز سے قبل اسٹیڈیم میں ان کی یاد میں خاموشی بھی اختیار کی گئی۔ ان کے کلب ممیلوڈی سن ڈاؤنز اور ان کی ساتھی عقیلہ ایڈنڈورف نے اپنے پیغامات میں انہیں ایک بہترین انسان اور عظیم کھلاڑی قرار دیتے ہوئے مداحوں سے دعاؤں کی اپیل کی ہے۔
جیدن ایڈمز نے انتہائی کم عمری میں فٹ بال کی دنیا میں بڑا نام کمایا۔ انہوں نے حال ہی میں ختم ہونے والے ورلڈ کپ کے گروپ میچوں میں میکسیکو، چیک جمہوریہ اور جنوبی کوریا کے خلاف شاندار کارکردگی دکھائی اور اپنی ٹیم کو پہلی بار ناک آؤٹ مرحلے تک پہنچانے میں اہم کردار ادا کیا۔ وہ 2023 کی افریقن کپ آف نیشنز میں کانسی کا تمغہ جیتنے والی جنوبی افریقی ٹیم کا حصہ بھی رہے اور مئی 2026 میں اپنے کلب کو سی اے ایف چیمپئنز لیگ کا ٹائٹل جتوانے میں بھی پیش پیش رہے
