دہشت گردوں کا تاثر دینا بلوچ خواتین اپنی مرضی سے خود کش حملہ کرتی ہیں سراسر جھوٹ ہے، بلوچ نوجوانوں کو پیغام ہے جو غلطی میں نے کی آپ نہ کریں، اس میں صرف ہمارا نقصان ہے، گرفتار خود کش حملہ آور کی پریس کانفرنس
کوئٹہ (الفجرآن لائن) تربت سے گرفتار خودکش حملہ آور عدیلہ بلوچ نے کہا ہے کہ دہشتگرد بلیک میل کرکے بلوچ خواتین کو ورغلاتے ہیں جس کی چشم دید گواہ ہوں،دہشت گردوں کا تاثر دینا بلوچ خواتین اپنی مرضی سے خود کش حملہ کرتی ہیں سراسر جھوٹ ہے، بلوچ نوجوانوں کو پیغام ہے جو غلطی میں نے کی آپ نہ کریں، اس میں صرف ہمارا نقصان ہے۔
تفصیلات کے مطابق کوئٹہ میں پریس کانفرنس کرتے ہوئے تربت سے گرفتار ہونیوالی خود کش حملہ آور عدیلہ بلوچ نے کہا کہ میں ایک کوالیفائیڈ نرس ہوں اورورلڈ ہیلتھ آرگنائزیشن کا ایک پراجیکٹ چلا رہی ہوں، میرا کام لوگوں کی مدد کرنا اور زندگیاں بچانا ہے مگر میری بدقسمتی ہے کہ میں ایسے عناصر کے ساتھ رہی جنہوں نے مجھے صحیح راستے سے بھٹکایا۔انہوں نے بتایا کہ مجھے ایسے بہکایا گیا کہ میں خود کش حملے کیلئے تیار ہو گئی، میں نے یہ بھی نہیں سوچا کہ میرے ایسا کرنے سے کتنے معصوم اور بیگناہ لوگوں کی جان جائے گی۔ انہوں نے بتایا کہ دہشتگردوں نے مجھے ایک نئی اور خوشگوار زندگی کے سبز باغ دکھائے گئے۔انہوں نے بتایا کہ میں اپنے گھر والوں کو بتائے بغیر دہشت گردون کے پاس پہاڑوں میں چلی گئی، وہاں جا کر مجھے احساس ہوا کہ یہاں مشکلات اور سخت زندگی کے سوا کچھ بھی نہیں،میرے علاوہ وہاں اور بھی بہکائے ہوئے بلوچ نوجوان موجود تھے۔انہوں نے بتایا کہ دہشت گردوں کی جانب سے یہ تاثر دینا کہ بلوچ خواتین اپنی مرضی سے خود کش حملہ کرتی ہیں سراسر جھوٹ ہے، دہشت گرد بلیک میل کرکے بلوچ خواتین کو ورغلاتے ہیں جس کی میں چشم دید گواہ ہوں، مجھے اپنے غلط راستے پر چلنے کا احساس تک نہیں ہوا۔انہوں نے کہا کہ میرا بلوچ نوجوانوں کیلئے پیغام ہے کہ جو غلطی میں نے کی ہے آپ نہ کریں، اس میں صرف ہمارا نقصان اور نہ ہی ایسے کاموں سے کوئی آزادی ملتی ہے۔انہوں نے بتایا کہ جن لوگوں سے میں ملی ہوں، اگر ایسے لوگ آپ کو ملیں تو اپنے والدین کو ضرور بتائیں، یہ بربادی کا راستہ ہے، اپنے آپ کو خود کش حملے میں استعمال کرکے مارنا حرام راستہ ہے، میں نہیں چاہتی کہ بلوچ نوجوان غلطی کریں جو میں نے کی۔
