اسلام آباد(الفجر آن لائن)وزیراعظم شہبازشریف نے کہا ہے کہ پولیو وائرس کے خلاف جنگ شروع کی ہوئی ہے‘پاکستان بھر میں پولیو کے 60 کیسز آنا تشویش کی بات ہے‘صوبائی حکومتوں کے ساتھ ملکر پولیو کے خلاف جیتیں گے۔اسلام آباد میں انسداد پولیو مہم سے متعلق تقریب سے خطاب کرتے ہوئے انہوں نے کہا کہ پولیو کے خلاف تعاون پر عالمی شراکت داروں کے شکر گزار ہیں، خاص طور پر سعودی عرب نے جو اس میں کردار ادا کیا ہے میں اس کے لیے شہزادہ محمد بن سلمان کا شکریہ ادا کرتا ہوں۔ان کا کہنا تھا کہ صوبائی حکومتوں کے ساتھ ملکر پولیو کے خلاف جیتیں گے، پاکستان بھر میں پولیو کے 60 کیسز آنا تشویش کی بات ہے اور اس کا انسداد ایک بہت بڑا چیلنج ہے، ہماری کوشش ہے کہ اس بار پولیو کے مرض کو پاکستان کی سرحدوں سے ہمیشہ ہمیشہ کے لیے باہر نکالیں۔
شہباز شریف نے کہا کہ بچوں کے والدین اس مہم میں پوری طرح ہماری رہنمائی فرمائیں اور اپنے بچوں کو قطرے پلا کر پولیو کے اس مرض سے ان کے مستقبل کو محفوظ کریں۔وزیراعظم نے تمام صوبوں میں کام کرنے والی پولیو ٹیمز کا شکریہ ادا کرتے ہوئے کہا کہ پولیو ورکرز کی ستائش کرتے ہیں اور ان کی بہادری کو سراہتے ہیں، مزید کہنا تھا کہ قانون نافذ کرنے والے اداروں کو بھی سراہتا ہوں کہ جہاں سیکیورٹی کے چیلنجز ہیں بھرپور طریقے سے ہماری مدد کررہے ہیں۔
