راولپنڈی ۔آرمی چیف جنرل سید عاصم منیر کا جنوبی وزیرستان کے علاقے وانا کا دورہ، موجودہ سیکیورٹی صورتحال اور انسداد دہشت گردی کے جاری آپریشنز پر تفصیلی بریفنگ، افسران اور جوانوں سے بات چیت میں ان کے غیر متزلزل عزم اور ثابت قدمی کو سراہتے ہوئے کہا کہ شہداء، پاکستان کا فخر ہیں، ان کی قربانیوں کو کبھی فراموش نہیں کیا جائے گا۔
آئی ایس پی آر کے مطابق آرمی چیف جنرل سید عاصم منیر نے جنوبی وزیرستان کے علاقے وانا کا دورہ کیا، جہاں انہیں موجودہ سیکیورٹی صورتحال اور انسداد دہشت گردی کی جاری کارروائیوں کے بارے میں تفصیلی بریفنگ دی گئی، افسران اور جوانوں کے ساتھ بات چیت کرتے ہوئے آرمی چیف جنرل سید عاصم منیر نے دہشت گردی کے خلاف میں ان کے غیر متزلزل عزم اور ثابت قدمی کو سراہتے ہوئے کہا کہ پوری قوم کو ان کی قربانیوں پر فخر ہے،
ان کا کہنا تھا کہ شہداء، پاکستان کا فخر ہیں اور ان کی قربانیوں کو کبھی فراموش نہیں کیا جائے گا، قوم کی مکمل حمایت سے پاک فوج اور قانون نافذ کرنے والے ادارے ملک میں پائیدار امن و استحکام کی بحالی کو یقینی بنارہے ہیں، آرمی چیف جنرل سید عاصم منیر نے واضح کیا کہ دہشت گردی اور انتہا پسندی کی ہر شکل کا خاتمہ یقینی بنایا جائے گا، انشاء اللہ، آرمی چیف نے اس بات پر بھی روشنی ڈالی کہ پاکستان کی مسلح افواج کی جرات، بہادری اور غیرمتزلزل عزم ملکی خودمختاری کا بنیادی جزو ہے، انہوں نے مسلح افواج اور قانون نافذ کرنے والے اداروں کے جوانوں کو قوم کا حقیقی ہیرو قرار دیا،
آرمی چیف جنرل سید عاصم منیر نے فتنہ الخوارج کے خاتمے کیلئے پاک فوج کے عزم کا اعادہ کرتے ہوئے واضح کیا کہ ریاست کے خلاف ان کی مذموم سرگرمیوں انہیں اور ان کے سہولت کاروں اور مالی معاونت کرنے والوں کو ادا کرنی ہوگی، قبل ازیں وانا پہنچنے پر کور کمانڈر پشاور نے آرمی چیف کا استقبال کیا،،
