ساؤتھ ڈکوٹا( ویب ڈیسک) صدر ڈونلڈ ٹرمپ نے ماؤنٹ رشمور کے تاریخی مقام پر ایک انتہائی سخت گیر تقریر کے ساتھ امریکہ کی 250 ویں سالگرہ کے جشن کا باقاعدہ آغاز کر دیا ہے۔ امریکی آزادی کے اعلامیے کے اس سنگ میل پر قوم سے خطاب کرتے ہوئے، صدر ٹرمپ نے اندرونی طور پر "کمیونسٹ خطرے” کے خلاف شدید وارننگ جاری کی۔ انہوں نے واضح طور پر اس نظریے کے حامیوں کو "4 جولائی 1776ء کا دشمن” قرار دیا۔
صدر ٹرمپ نے ماؤنٹ رشمور کی پہاڑی پر تراشے گئے عظیم امریکی صدور واشنگٹن، جیفرسن، لنکن اور روزویلٹ کے مجسموں کے سائے تلے آدھے گھنٹے تک جوشیلا خطاب کیا۔ انہوں نے اس موقع پر کمیونزم کے پھیلاؤ کو امریکی آزادی کے لیے ایک مہلک خطرہ قرار دیا اور اس کا موازنہ ماضی کے بڑے عالمی بحرانوں سے کیا۔ تقریب کے دوران وہاں موجود حامیوں نے( یو ایس اے!) کے فلک شگاف نعرے لگائے، جبکہ فضا میں ایف-16 جنگی طیاروں نے شاندار فلائی پاسٹ بھی کیا۔
دوسری جانب، صدر ٹرمپ کے اس سیاسی خطاب پر شدید تنازع کھڑا ہو گیا ہے۔ حزبِ اختلاف اور ڈیموکریٹس نے صدر پر الزام عائد کیا ہے کہ انہوں نے ملک کے اس عظیم اور تاریخی دن کو اپنی ذاتی تشہیر اور انتخابی مہم کے ایجنڈے کے لیے استعمال کیا ہے۔ تاہم، وائٹ ہاؤس کے منتظمین نے ان الزامات کو یکسر مسترد کرتے ہوئے کہا ہے کہ یہ تقریب خالصتاً امریکی تاریخ اور آزادی کا جشن منا رہی ہے
