کوئٹہ (ویب ڈیسک) وزیر اعلیٰ بلوچستان میر سرفراز بگٹی نے نشانِ حیدر پانے والے نامور سپوت کیپٹن کرنل شیر خان شہید کے 27ویں یومِ شہادت پر انہیں زبردست خراجِ عقیدت پیش کیا ہے۔ اپنے ایک خصوصی پیغام میں وزیر اعلیٰ نے کہا کہ کیپٹن کرنل شیر خان شہید کی لازوال قربانی پاکستان کی عسکری تاریخ کا ایک ایسا روشن باب ہے جو ہمیشہ آنے والی نسلوں کے دلوں کو گرماتا رہے گا۔ انہوں نے انتہائی نامساعد حالات میں بھی جرات، بہادری اور فرض شناسی کی وہ بے مثال تاریخ رقم کی جس پر پوری قوم کو فخر ہے۔
میر سرفراز بگٹی نے وطن عزیز کے دفاع کی اہمیت پر زور دیتے ہوئے کہا کہ ملک کی حفاظت ہر پاکستانی کا مقدس فریضہ ہے۔ آج پاکستان اگر امن، سلامتی اور خودمختاری کے ساتھ قائم ہے تو یہ صرف اور صرف ہمارے عظیم شہداء کی قربانیوں کی بدولت ہے۔ ان کا کہنا تھا کہ شہداء کا خون قوم کا اثاثہ ہے اور ان کی عظیم قربانیاں ہماری آنے والی نسلوں کے لیے ہمیشہ ایک مشعلِ راہ کا کام کرتی رہیں گی۔
اپنے پیغام کے آخر میں وزیر اعلیٰ بلوچستان نے مسلح افواج کے ساتھ مکمل یکجہتی کا اظہار کیا۔ انہوں نے عزم دہرایا کہ حکومتِ بلوچستان اور صوبے کے غیور عوام ہر بیرونی و اندرونی خطرے اور سازش کے مقابلے میں اپنی بہادر مسلح افواج کے شانہ بشانہ کھڑے ہیں۔ ملک دشمن عناصر کو کبھی ان کے ناپاک عزائم میں کامیاب نہیں ہونے دیا جائے گا اور شہداء کے مشن کو ہر قیمت پر جاری رکھا جائے گا۔
