ڈیلاس ( الفجرآن لائن) فیفا ورلڈ کپ 2026 کے پہلے سیمی فائنل میں اسپین نے شاندار کھیل کا مظاہرہ کرتے ہوئے فرانس کو 0-2 سے شکست دے کر فائنل کے لیے کوالیفائی کر لیا۔ ڈیلاس اسٹیڈیم میں کھیلے گئے اس اہم مقابلے میں اسپین نے ابتدا ہی سے میچ پر اپنی گرفت مضبوط رکھی اور فرانس کو واضح مواقع بنانے سے روکے رکھا۔
اسپین کی جانب سے میکیل اویارزابال نے 22ویں منٹ میں پنالٹی کک پر گول کرکے اپنی ٹیم کو برتری دلائی۔ یہ پنالٹی نوجوان اسٹار لامین یامال کے خلاف فاؤل کے بعد دی گئی۔ دوسرے ہاف میں پیڈرو پورو نے 58ویں منٹ میں گول اسکور کرکے اسپین کی برتری کو دگنا کر دیا، جس کے بعد فرانس میچ میں واپسی نہ کر سکا۔
فرانس کے پاس کیلیان ایمباپے، عثمان ڈیمبیلے اور مائیکل اولیسے جیسے عالمی شہرت یافتہ کھلاڑی موجود تھے، تاہم اسپین کی منظم دفاعی حکمت عملی اور مڈفیلڈ پر مضبوط کنٹرول کے باعث فرانسیسی ٹیم خاطر خواہ مواقع پیدا کرنے میں ناکام رہی۔ اسپین نے پورے میچ میں اعتماد اور نظم و ضبط کے ساتھ کھیل پیش کیا۔
اس فتح کے ساتھ اسپین نے فیفا ورلڈ کپ 2026 کے فائنل میں اپنی جگہ پکی کر لی ہے، جہاں اس کا مقابلہ انگلینڈ اور ارجنٹینا کے درمیان ہونے والے دوسرے سیمی فائنل کے فاتح سے ہوگا۔ دوسری جانب فرانس اب تیسری پوزیشن کے میچ میں شرکت کرے گا۔
