اسلام آباد : ایف آئی اے نے افغان شہریوں کو پاکستانی شناختی کارڈ کے اجراء پر نادرا اہلکاروں کی تفصیلات طلب کرلیں۔ تفصیلات کے مطابق ایف آئی اے اینٹی ہیومن ٹریفکنگ سرکل سے جاری مراسلے کے مطابق ایف آئی اے نے افغان شہریوں کو پاکستانی شناختی کارڈ جاری ہونے کے معاملے پر تحقیقات کا آغاز کرتے ہوئے نادرا سے جاری 6پاکستانی شناختی کارڈز کی تفصیلات مانگی ہیں۔
مراسلے کے مطابق شناختی کارڈز پراسیس کرنیوالے نادرا اہلکاروں کے نام، سسٹم لاگ ان کی سرکاری تفصیلات سمیت فارم کے تصدیق کنندہ کی تفصیلات بھی طلب کی گئی ہیں۔طلب کردہ تفصیلات میں ایف آئی اے کے ہاتھوں گرفتار زرداد نامی افغان شہری کو محب اللہ کے نام سے جاری شناختی کارڈ بھی شامل ہے،محب اللہ کی مبینہ ماں امیراں بی بی سمیت 4دیگر شناختی کارڈز کی تفصیلات بھی مانگی گئی ہیں۔
نادرا کو ارسال مراسلے میں ریجنل ہیڈکوارٹرز نادرا کے ڈائریکٹر آپریشنز کو بھی درکار ریکارڈ کے ہمراہ پیش ہونے کی ہدایت کی گئی ہے۔
