ایمسٹل وین (اسپورٹس ڈیسک) پاکستان اور بھارت کی ہاکی ٹیمیں آج ایف آئی ایچ مینز ہاکی ورلڈ کپ 2026 کے پول ڈی کے انتہائی اہم اور سنسنی خیز مقابلے میں آمنے سامنے ہوں گی۔ دونوں روایتی حریفوں کے درمیان یہ میچ نیدرلینڈز کے شہر ایمسٹل وین میں واقع واگنر ہاکی اسٹیڈیم میں کھیلا جائے گا۔
پاکستان کے لیے یہ مقابلہ کرو یا مرو کی حیثیت رکھتا ہے، جبکہ بھارت بھی اگلے مرحلے میں رسائی یقینی بنانے کے لیے کامیابی یا کم از کم ڈرا کا خواہاں ہے۔ پول ڈی میں انگلینڈ پہلے ہی مضبوط پوزیشن میں ہے، جبکہ بھارت، پاکستان اور ویلز اگلے مرحلے کی دوڑ میں اہم مرحلے پر پہنچ چکے ہیں۔
بھارت نے ٹورنامنٹ کا آغاز ویلز کے خلاف 3-1 کی کامیابی سے کیا، تاہم اسے انگلینڈ کے ہاتھوں 2-4 سے شکست کا سامنا کرنا پڑا۔ دوسری جانب پاکستان کو انگلینڈ کے خلاف شکست ہوئی جبکہ ویلز کے خلاف میچ 3-3 سے برابر رہا۔
قومی ٹیم کے اسسٹنٹ کوچ عدنان ذاکر کا کہنا ہے کہ پاکستان پر اضافی دباؤ نہیں ہوگا اور گرین شرٹس بھارت کے خلاف بھرپور مقابلہ کرنے کی صلاحیت رکھتے ہیں۔ پاکستان کے کپتان ابو بکر محمود نے بھی رینکنگ اور سابقہ نتائج کو غیر اہم قرار دیتے ہوئے ٹیم کی صلاحیتوں پر اعتماد کا اظہار کیا ہے۔
یہ مقابلہ 16 سال بعد ہاکی ورلڈ کپ میں پاکستان اور بھارت کے درمیان دوبارہ ہونے والا اہم میچ ہے، جس کے باعث دنیا بھر کے ہاکی شائقین کی نظریں ایمسٹل وین پر مرکوز ہیں۔ واگنر اسٹیڈیم میں تقریباً 10 ہزار شائقین کی گنجائش ہے اور میچ کے لیے اسٹیڈیم مکمل طور پر فروخت ہو چکا ہے۔
پاکستانی شائقین کو امید ہے کہ گرین شرٹس روایتی حریف کے خلاف شاندار کھیل پیش کرتے ہوئے فتح حاصل کریں گے اور ورلڈ کپ کے اگلے مرحلے تک رسائی کی امید برقرار رکھیں گے
