وزیراعلیٰ میر سرفراز بگٹی کی زیر صدارت پبلک پرائیویٹ پارٹنرشپ بورڈ کے دسویں اجلاس میں منظوری، سوئی میں لو بی ٹی یو گیس سے فرٹیلائزر کمپلیکس قائم کرنے پر بھی اتفاق، صنعتی ترقی اور روزگار کے نئے مواقع پیدا ہونے کی توقع۔
کوئٹہ (الفجر آن لائن): حکومت بلوچستان نے پبلک پرائیویٹ پارٹنرشپ (PPP) کے تحت صوبے کی پہلی انشورنس کمپنی قائم کرنے کا فیصلہ کر لیا ہے، جس کی پبلک پرائیویٹ پارٹنرشپ بورڈ نے منظوری دے دی ہے۔ مجوزہ انشورنس کمپنی بلوچستان میں رجسٹرڈ ہوگی اور اس کے قیام پر ابتدائی طور پر 2 ارب روپے لاگت آئے گی۔
تفصیلات کے مطابق وزیراعلیٰ بلوچستان میر سرفراز بگٹی کی زیر صدارت پبلک پرائیویٹ پارٹنرشپ بورڈ کا دسواں اجلاس منعقد ہوا، جس میں صوبے میں سرمایہ کاری کے فروغ، صنعتی ترقی اور معاشی سرگرمیوں کے نئے مواقع پیدا کرنے سے متعلق اہم فیصلے کیے گئے۔
اجلاس میں بریفنگ دیتے ہوئے بتایا گیا کہ بلوچستان میں مقامی سطح پر انشورنس کمپنی کے قیام سے سرکاری اداروں اور شہریوں کو انشورنس کی بہتر سہولیات میسر آئیں گی۔ اس منصوبے سے صوبے میں مالیاتی خدمات کے شعبے کو فروغ دینے اور سرمایہ کاری کے نئے امکانات پیدا کرنے میں بھی مدد ملے گی۔
اجلاس میں سوئی کے علاقے میں لو بی ٹی یو (Low BTU) گیس کو استعمال کرتے ہوئے فرٹیلائزر کمپلیکس قائم کرنے پر بھی اتفاق کیا گیا۔ اس منصوبے کو بلوچستان میں صنعتی ترقی اور قدرتی وسائل کے مؤثر استعمال کی جانب ایک اہم پیش رفت قرار دیا گیا۔
وزیراعلیٰ بلوچستان میر سرفراز بگٹی نے اجلاس سے خطاب کرتے ہوئے کہا کہ مقامی سطح پر انشورنس کمپنی کا قیام صوبے میں سرمایہ کاری اور مالیاتی خدمات کے فروغ میں معاون ثابت ہوگا۔ حکومت بلوچستان پبلک پرائیویٹ پارٹنرشپ کے ذریعے معاشی سرگرمیوں کے نئے مواقع پیدا کر رہی ہے۔
انہوں نے کہا کہ سرمایہ کاری کے فروغ اور نجی شعبے کی شراکت داری کے ذریعے بلوچستان کی معاشی استعداد سے بھرپور استفادہ کیا جائے گا، جبکہ ترقیاتی منصوبوں میں نجی شعبے کو شامل کرکے پائیدار معاشی ترقی کے لیے اقدامات جاری رکھے جائیں گے۔
میر سرفراز بگٹی کا کہنا تھا کہ سوئی میں فرٹیلائزر کمپلیکس کا قیام صنعتی ترقی اور مقامی قدرتی وسائل کے مؤثر استعمال کی جانب اہم قدم ہے۔ اس منصوبے سے تجارتی سرگرمیوں کو فروغ ملنے کے ساتھ مقامی آبادی کے لیے روزگار کے وسیع مواقع بھی پیدا ہوں گے۔
وزیراعلیٰ نے مزید کہا کہ حکومت بلوچستان قدرتی وسائل کو بروئے کار لا کر صوبے میں مقامی صنعتوں کا قیام اور روزگار کے مواقع پیدا کرنا چاہتی ہے۔ صنعتی منصوبوں کے ذریعے نوجوانوں کو روزگار کی فراہمی اور معاشی خودمختاری کے امکانات بڑھائے جائیں گے۔
انہوں نے اس عزم کا اظہار کیا کہ حکومت صوبے کی معاشی ترقی کے لیے پبلک پرائیویٹ پارٹنرشپ کو مزید فروغ دے گی تاکہ سرمایہ کاری، صنعتی سرگرمیوں اور روزگار کے نئے مواقع پیدا کیے جا سکیں۔
واضح رہے کہ پبلک پرائیویٹ پارٹنرشپ بورڈ کے اجلاس میں انشورنس کمپنی اور سوئی میں فرٹیلائزر کمپلیکس کے حوالے سے کیے گئے فیصلوں کو بلوچستان میں سرمایہ کاری اور صنعتی ترقی کے لیے اہم پیش رفت قرار دیا جا رہا ہے۔

