آٹے کا معیار بہتر ،آبادی کے مطابق دستیابی یقینی بنائی جائیگی، بجلی میٹروں کی خریداری آئندہ مالی سال بذریعہ ای ٹینڈر کی جائیگی
مظفرآباد(الفجر آن لائن) صدر آزاد کشمیر بیرسٹر سلطان محمود نے متنازعہ صدارتی آرڈیننس واپس لے لیا۔آزاد کشمیر حکومت اور عوامی ایکشن کمیٹی کے درمیان کامیاب مذاکرات کے بعد بیرسٹر سلطان محمود نے متنازعہ پیس فل اسمبلی اینڈ پبلک آرڈر آرڈیننس 2024ؤاپس لے لیا ہے جس کا نوٹیفکیشن بھی جاری کردیا گیاہے جبکہ عوامی ایکشن کمیٹی نے 23جنوری کو لانگ مارچ کی کال بھی واپس لے لی ۔ایکشن کمیٹی اور حکومتی وزیر نے 12نکاتی معاہدے پر دستخط کر دیئے ہیں ۔
معاہدے کے تحت جوائنٹ عوامی ایکشن کمیٹی کے چارٹر آف ڈیمانڈ پر 6ماہ میں بات چیت کے ذریعے عمل درآمد ہوگا، 50کے علاوہ باقی تمام ایف آئی آرز ضابطہ کے تحت 90 دن کے اندر ختم کی جائیں گی۔برطرف ملازم صہیب عارف کو سات دن کے اندر بحال کیا جائے گا، اظہر شہید کے بھائی کو سات دن کے اندر سرکاری ملازمت دی جائے گی اور چار زخمیوں کو فی کس 10لاکھ روپے معاوضہ سات دن کے اندر ادا کیا جائے گا۔معاہدے کے تحت آٹے کا معیار بہتر اور آبادی کے مطابق دستیابی یقینی بنائی جائے گی، بجلی میٹروں کی خریداری آئندہ مالی سال میں بذریعہ ای ٹینڈر کی جائے گی۔
