اسلام آباد (الفجرآن لائن) صدر مملکت آصف علی زرداری نے پاکستان کے مایہ ناز اور عالمی شہرت یافتہ سماجی رہنما عبدالستار ایدھی کو ان کی دسویں برسی کے موقع پر زبردست الفاظ میں خراج عقیدت پیش کیا ہے۔ اپنے خصوصی پیغام میں صدر مملکت نے کہا کہ عبدالستار ایدھی کا نام انسانیت کی بے لوث خدمت، ہمدردی اور قربانی کا دوسرا نام ہے، جن کی خدمات پر پوری پاکستانی قوم کو ہمیشہ فخر رہے گا۔
صدر آصف علی زرداری نے اس بات پر زور دیا کہ عبدالستار ایدھی نے رنگ، نسل، زبان اور مذہب کی تفریق سے بالاتر ہو کر دکھی انسانیت کی خدمت کی۔ انہوں نے کہا کہ ایدھی صاحب نے لاوارث بچوں، بیواؤں، بزرگوں اور معاشرے کے پسماندہ طبقات کو گلے لگایا اور دنیا کے سب سے بڑے رضاکارانہ ایمبولینس نیٹ ورک سمیت یتیم خانوں اور شیلٹر ہومز کا ایک ایسا مضبوط ادارہ قائم کیا جو آج بھی فیصل ایدھی کی قیادت میں لاکھوں لوگوں کا سہارا بنا ہوا ہے۔
صدر مملکت نے اپنے پیغام کے آخر میں ہم وطنوں پر زور دیا کہ وہ عبدالستار ایدھی کے مشن اور نظریات کو آگے بڑھائیں۔ انہوں نے کہا کہ ایدھی صاحب کو سچا خراج عقیدت یہی ہے کہ ہم اپنے اردگرد موجود ضرورت مندوں کی مدد کریں اور ملک میں امن، محبت اور انسانی ہمدردی کے رشتوں کو مضبوط بنا کر ایک فلاحی معاشرے کی تشکیل میں اپنا کردار ادا کریں۔
