کابل (الفجر آن لائن) افغانستان کے صوبہ لوگر میں ایک رہائشی مکان کے اندر مبینہ طور پر دیسی ساختہ بم (آئی ای ڈی) کی تیاری کی ویڈیو اور تصاویر منظرِ عام پر آنے کا دعویٰ کیا گیا ہے۔
دستیاب مواد میں ایک شخص کو گھر کے اندر مبینہ طور پر آئی ای ڈی تیار کرتے ہوئے دکھایا گیا ہے، جبکہ ویڈیو میں بچوں کی موجودگی بھی نظر آتی ہے۔
ذرائع کے مطابق سامنے آنے والی ویڈیو نے افغانستان میں شہری آبادی کے اندر مبینہ طور پر دھماکا خیز مواد کی تیاری اور ذخیرہ کیے جانے کے حوالے سے سیکیورٹی خدشات کو نمایاں کر دیا ہے۔
تاہم ویڈیو کے مقام، تاریخ اور اس میں موجود افراد کی شناخت کی آزادانہ تصدیق ضروری ہے۔
سیکیورٹی و دفاعی ماہرین کے مطابق اگر رہائشی علاقوں میں دھماکا خیز مواد کی تیاری یا ذخیرہ کیے جانے کے واقعات کی تصدیق ہوتی ہے تو اس سے عام شہریوں، خصوصاً بچوں، کی سلامتی کو شدید خطرات لاحق ہو سکتے ہیں۔
ماہرین نے کہا کہ مسلح گروہوں کی سرگرمیوں اور شہری آبادی کے درمیان فاصلہ برقرار رکھنا انسانی جانوں کے تحفظ کے لیے بنیادی اہمیت رکھتا ہے۔
ماہرین نے مزید دعویٰ کیا کہ پاکستان کی جانب سے سرحد پار موجود مبینہ دہشت گرد ٹھکانوں کے خلاف کارروائیوں کے بعد شہریوں کے تحفظ سے متعلق اعتراضات سامنے آتے رہے ہیں،
تاہم ان کے مطابق مسلح عناصر کی جانب سے رہائشی علاقوں کو مبینہ طور پر استعمال کیے جانے کا معاملہ بھی غیر جانب دارانہ تحقیقات کا متقاضی ہے۔
سیکیورٹی ماہرین کے مطابق افغانستان میں مسلح گروہوں کی سرگرمیوں، دیسی ساختہ دھماکا خیز آلات کی تیاری اور مبینہ سہولت کاری کے الزامات کی مؤثر نگرانی ضروری ہے تاکہ افغانستان اور خطے میں دہشت گردی کے خطرات کو کم کیا جا سکے
