اسلام آباد(نمائندہ خصوصی محمد ثاقب خان): اکاؤنٹنٹ جنرل پاکستان ریونیوز جناب نثار احمد چیمہ نے پریس انفارمیشن ڈیپارٹمنٹ (PID) کا دورہ کیا اور ایگزیکٹو ڈائریکٹر جنرل/پرنسپل انفارمیشن آفیسر (EDG/PIO) محترمہ رئیسہ عادل سے اہم ملاقات کی۔ ملاقات کے دوران میڈیا اداروں کی ادائیگیوں کے طریقہ کار میں ہونے والی حالیہ پیش رفت پر تفصیلی گفتگو کی گئی۔ جناب نثار احمد چیمہ نے یقین دہانی کرائی کہ AGPR میڈیا انڈسٹری کو واجبات کی جلد اور فوری فراہمی یقینی بنانے کے لیے ہر ممکن تعاون فراہم کرنے کے لیے مکمل پرعزم ہے۔
ایگزیکٹو ڈائریکٹر جنرل محترمہ رئیسہ عادل نے AGPR کے سربراہ کے دورے کا خیرمقدم کیا اور میڈیا ادائیگیوں کے عمل کو ہموار، شفاف اور بروقت بنانے کے لیے پی آئی ڈی اور اے جی پی آر کے درمیان جاری قریبی رابطے اور ورکنگ ریلیشن شپ کو سراہا۔ انہوں نے امید ظاہر کی کہ اس باہمی تعاون سے میڈیا ہاؤسز کے دیرینہ مسائل کو حل کرنے میں مدد ملے گی۔
بعد ازاں، جناب نثار احمد چیمہ نے پریس انفارمیشن ڈیپارٹمنٹ اسلام آباد کے ماتحت دفتر (SOC) کا بھی دورہ کیا اور میڈیا اداروں کو ادائیگیوں کے جاری عمل کا براہِ راست جائزہ لیا۔ انہوں نے مجاز اتھارٹی کی ہدایات کے مطابق ادائیگیوں کو تیز کرنے کے لیے SOC کے افسران اور عملے کی لگن، مؤثر رابطہ کاری اور مخلصانہ کوششوں کی تعریف کی۔ انہوں نے مقررہ مدت کے اندر ٹاسک مکمل کرنے پر پوری ٹیم کی مشترکہ کارکردگی کو سراہتے ہوئے باہمی تعاون کے تسلسل پر زور دیا۔
