پاک وطن کی دلیر بیٹی نے جرت و بہادری کی تاریخ رقم کی
لاہور(الفجر آن لائن)پاکستان کی پہلی خاتون فائٹر پائلٹ مریم مختیار کی اتوار کو 9 ویں برسی منائی گئی، پاک وطن کی دلیر بیٹی نے جان کی قربانی دے کر جرت و بہادری کی تاریخ رقم کی۔ مریم مختیار نے 24 نومبر 2015 کو تربیتی طیارے پر معمول کی پرواز کے دوران میانوالی کے قریب جہاز میں فنی خرابی ہوئی تو جہاز کا رخ غیر آباد علاقے کی طرف موڑ لیا مگر زندگی نے مہلت نہ دی اور انہوں نے دوران ڈیوٹی شہید ہونے والی پاک فضائیہ کی پہلی فائٹر پائلٹ کا اعزاز حاصل کیا۔شہید پائلٹ مریم مختیار کوکراچی ملیر کینٹ کے قبرستان میں سپرد خاکیا گیا، قوم کی نڈر اور دلیر بیٹی کو تمغہ شجاعت سے نوازا گیا۔ مریم مختیار 18 مئی 1992 کو کراچی میں پیدا ہوئیں، انہوں نے انٹرمیڈیٹ کا امتحان آرمی پبلک سکول و کالج ملیر کینٹ سے پاس کیا، مریم نے فٹبال کی بہترین کھلاڑی ہونے کی وجہ سے نیشنل ویمن فٹبال چیمپئن شپ میں بلوچستان یونائیٹڈ کی نمائندگی بھی کی۔ 2014 میں مریم مختیار پاکستان ایئرفورس میں بطور گریجوایٹ شامل ہوئیں، ان کا تعلق پی اے ایف کے 132 ویں جی ڈی پائلٹ کورس سے تھا جس میں 6 دیگر خواتین بھی شامل تھیں، مریم مختیار کا شمار پاک فضائیہ کے جنگجو پائلٹس میں ہوتا تھا۔
