اسلام آباد(الفجر آن لائن)انسانی حقوق کمیشن پاکستان (ایچ آر سی پی)نے کہا ہے کہ اسلام آباد انتظامیہ کی جانب سے طلبہ سے ہاسٹلز خالی کروانے کا اقدام باعث تشویش ہے ، طلبہ کو بغیر کسی جرم یا قصور کے رہائش سے محروم کر دیا گیا ہے۔اپنے ایک بیان میں ایچ آر سی پی کے ترجمان نے کہا کہ موٹر وے سمیت پنجاب اور خیبرپختونخوا سے اسلام آباد کی طرف جانے والی سڑکوں کی بندش سے عام شہریوں اور مزدوروں کی زندگیوں پر منفی اثرات مرتب ہو رہے ہیں۔
ان راستوں کی بندش سے لوگوں کی آزادانہ نقل و حرکت متاثر ہو رہی ہے، جو ان کے روزگار کے حق سے جڑی ہوئی ہے۔انہوں نے کہا حکومت فوری طور پر ان اقدامات پر نظر ثانی کرے اور شہریوں کے حقوق کی حفاظت کرے، تاکہ عوامی نقل و حرکت میں رکاوٹ نہ آئے اور طلبہ کو تحفظ فراہم کیا جائے۔
